Qaraǵandylyq tarıhy bar oıynshyqtar jınaýmen aınalysady
ASTANA. QazAqparat - Áınek, shyny, karton jáne penoplast. Buryn jańa jyldyq shyrshaǵa arnalǵan oıynshyqtar osyndaı materıaldardan jasalatyn. Olar kollektsııa jınaýshylar úshin óte qundy. Máselen, Qaraǵandy oblysynda turatyn ustaz Irına Doroshenko ondaǵan jyldar boıy shyrsha áshekeılerin jınaýmen aınalysyp júr, dep jazady Habar 24 .
Informatıka pániniń muǵalimi Irına Doroshenko shyrshanyń oıynshyqtaryn jınaýǵa áýes. Arasynda rarıret, sırek kezdesetin baǵaly áshekeıler de bar. Qystyrǵyshy bar oıynshyqtar 50-jyldary ár shyrshada ilýli turdy. Keıin aýyl sharýashylyǵy men turmysta qoldanylatyn zat túrinde shyǵaryla bastady. Kóp uzamaı shynydan jasalǵan kóptegen jemis-jıdek men kókónis maketter paıda bola bastady.
«Biz oıynshyqtarǵa qarap, baǵdarshamnyń ne ekenin, onyń qandaı bolatynyn bildik. Óıtkeni men turǵan aýylda olar atymen joq edi. Sonymen qatar kollektsııamda 50-jyldardan qalǵan oıynshyqtar bar. Olar jeńil plastmassadan jasalǵan, synbaıdy, áli qoldanyp júrmiz», - deıdi kollektsııa jınaýshy Irına Doroshenko.
70-jyldardyń basynda shyrshalar samaýryndar, sháınekter men shamdarmen sándendirildi. Sodan keıin qyzyl juldyz, ertegi keıipkerleri sánge aınaldy. Jyl saıyn mundaı oıynshyqtarǵa suranys ta artty. Baǵasy da kóterildi. Ǵalamtorda osyndaı shyrshaǵa arnalǵan áshekeıler satylatyn saıttar bar. Baǵalary 1500 teńgeden 40 myńǵa deıin jetedi. Baǵasynan buryn satyp alýshylarǵa olardyń erekshe atmosferaǵa bóleıtindigi, balalyq shaqty eske túsiretindigimen qundy.
«Elde bolǵan oqıǵalar barlyq salaǵa áser etti. Ózgerister, jańalyqtar mádenıette, kıno, tipti oıynshyq óndirisinde de óz kórinisin tapty. Mysaly, ǵaryshqa oıynshyq-ǵaryshkerler ushyryldy. Tsırktiń dáýreni júrip turǵanda, sáıkesinshe osy taqyryptaǵy buıymdar shyǵaryla bastady. Negizi oıynshyqtar belgili bir zaman, sol ýaqytta ómir súrgen adamdar týraly, bútin bir el týraly syr shertedi», - deıdi Temirtaý qalalyq tarıhı-ólketaný mýzeıi dırektorynyń orynbasary Leıla Alıkeeva.
Rasynda osydan keıin eski oıynshyqtardy paıdaǵa aspaıdy dep laqtyryp tastap, ornyna jańasyn almas buryn durystap oılaný kerek. Árıne, jyltyraǵan áshekeıler kózdiń jaýyn alatyny sózsiz. Biraq olardyń arasynan sapaly ári kóńilden shyǵatynyn tańdap alý qıynnyń qıyny.
