Qaraǵandylyq stýdentter hımııa páninen respýblıkalyq olımpıadanyń bas júldesin jeńip aldy

Stýdentterdiń hımııa ǵylymyna degen tanymdyq qyzyǵýshylyǵyn arttyrý, ǵylymı-zertteý daǵdysyn damytý, hımııalyq bilimdi nasıhattaý maqsatynda ótken bilim dodasyna elimizdiń 14 oblysy men Astana, Almaty qalalarynyń JOO-nan árqaısysy úsh stýdentten turatyn 15 komanda qatysty.

Bilim dodasy eki kezeńnen turdy. Birinshi týrda stýdentter hımııadan esepter shyǵarý boıynsha synǵa tússe, ekinshi týrda túrli eksperımentter jasap bilimderin synady. Olarǵa hımııa salasynyń belgili ǵalymdary men bilikti mamandarynan quralǵan qazylar alqasy baǵa berdi.

Olımpıada qorytyndysy boıynsha bas júldeni E.A.Bóketov atyndaǵy Qaraǵandy memlekettik ýnıversıtetiniń komandasy jeńip aldy. І orynǵa Qostanaı memlekettik pedagogıkalyq ınstıtýtynyń stýdentteri ıe boldy. ІІ oryndy Qyzdar ýnıversıteti men M.Qozybaev atyndaǵy Soltústik Qazaqstan memlekettik ýnıversıteti ózara bólisti. Al ІІІ orynǵa tigilgen eki júlde І.Jansúgirov atyndaǵy Jetisý memlekettik ýnıversıteti men Y.Altynsarın atyndaǵy Arqalyq memlekettik pedagogıkalyq ınstıtýtynan kelgen komandalarǵa buıyrdy.

Budan ózge, erekshe belsendiligimen kózge túsken ozyq qatysýshylar da marapattaldy. Ondaı marapatqa M.Ótemisov atyndaǵy Batys Qazaqstan memlekettik ýnıversıtetiniń stýdenti A.B.Myrzabekov (1-oryn), Qorqyt Ata atyndaǵy Qyzylorda memlekettik ýnıversıtetiniń túlekteri J.A.Asylbekova men A.Á.Aqbergen (2-oryn), Abaı atyndaǵy Qazaq Ulttyq pedagogıkalyq ýnıversıtetiniń stýdenti A.K.Toılebaı (3-oryn), Pavlodar memlekettik pedagogıkalyq ınstıtýtynyń stýdenti A.Erkinǵalıqyzy ıe boldy. Jeńimpazdar baǵaly syılyqtarmen, arnaıy dıplomdarmen marapattalady.

Dástúr boıynsha respýblıkalyq pándik olımpıadanyń estafetasy І oryn alǵan oqý ornyna tabystaldy. Kelesi jyly osyndaı saıysty Qostanaı memlekettik pedagogıkalyq ınstıtýty ótkizetin bolady.