Qaraǵandylyq stýdentter halyqaralyq olımpıadada jeńimpaz atandy
QARAǴANDY. QazAqparat – Qaraǵandy medıtsına ýnıversıtetiniń stýdentteri Jangúl Jeńis pen Asyl Arshkenov «Medıtsına vırtýozdary» praktıkalyq daǵdylar boıynsha I Halyqaralyq olımpıada jeńimpazdarynyń dıplomdarymen marapattaldy. Sharany Tashkent medıtsına akademııasy uıymdastyrdy, dep habarlaıdy QazAqparat tilshisi.
Olımpıadaǵa TMD elderiniń medıtsınalyq ýnıversıtetterinen 14 komanda qatysty. Qazylar alqasynyń quramynda densaýlyq saqtaý júıesinde jumys isteıtin joǵary bilikti mamandar, DDU men ıÝNESKO sarapshylary boldy.
Baıqaýǵa qatysýshylar akademııanyń sımýlıatsııalyq ortalyǵyndaǵy «Sımýlıatorda esepterdi sheshý (vırtýaldy naýqas)», «Sımýlıatorda jedel medıtsınalyq kómek kórsetý daǵdylary» jáne «Manýaldyq daǵdylaryn kórsetý» sııaqty stantsııalarda óz tájirıbelik daǵdylaryn kórsetti.
Qaraǵandylyq «Meıirbıke isi» akademııalyq bakalavrıat mamandyǵynyń 3-kýrs stýdentteriniń bilimderi men daǵdylaryn baıqaý tóreshileri biraýyzdan joǵary baǵalady.
Jangúl Jeńis «Eń bilimdi» nomınatsııasynda jeńiske jetse, «Eń maqsatty» nomınatsııasynda Asyl Arshkenov úzdik atandy. Komandalyq jarysta da olar kóptegen qarsylastarynan oza túsip, «Eń erekshe komanda» atandy.
«Men bir nárseni senimdi túrde aıta alamyn: jeńiske jetý ońaı bolǵan joq. Qarsylastar óte myqty boldy jáne tek jeńiske umtyldy. Men úshin eń qıyny jáne este qalǵany vırtýaldy naýqaspen jumys istegen kezeń boldy», – deıdi Asyl Arshkenov.
Jangúl Jeńistiń aıtýynsha, olımpıada kóptegen jańa jáne qyzyqty nárselerdi úırenýge jáne tájirıbe jınaqtaýǵa múmkindik bergen.
