Qaraǵandylyq sportshy paýerlıftıngten jańa álemdik rekord ornatty
QARAǴANDY. QazAqparat - Qaraǵandy oblysynyń dene shynyqtyrý jáne sport basqarmasynda paýerlıfterlerge qurmet kórsetildi. Kezdesýdiń basty keıipkeri Qaraman Abdýlkárim boldy. Qaraǵandylyq sportshy eki ret álem chempıony atanyp, jańa álemdik rekord ornatty, dep habarlaıdy QazAqparat tilshisi.
Paýerlıftıng boıynsha Halyqaralyq birinshilik 18-25 mamyr aralyǵynda Tokıo qalasynda ótti. «Klassıkalyq syǵymdap kóterý» tártibi boıynsha 59 keli salmaq dárejesinde altyn medaldi jerlesimiz jeńip aldy. Sonymen qatar, saıys barysynda ol jańa álemdik rekord ornatty - 175,5 keli. Japonııadaǵy birinshiliktiń sońǵy kúni - 24 mamyrda Qaraman Abdýlkárim 217,5 keli nátıjesimen «jabdyqsyz shtangany jatyp kóterý» tártibi boıynsha birinshi oryndy ıelendi.
«Ótken jyly álem chempıonatynda ekinshi oryn aldym. Osydan keıin 2019 jyly altyn medal alyp, álemdik birinshiliktiń úsh márte jeńimpazy atanam dep ózime maqsat qoıdym. Olımpıadalyq emes sport túrinde bul jetistik eńbek sińirgen sport sheberi ataǵyn alýǵa múmkindik beredi. Óz armanymdy júzege asyrǵanyma óte qýanyshtymyn», - dedi rekordshy.
Qaraman Abdýlkárim - oblystyq keshendi sport mektebiniń túlegi, Qaraǵandy oblysynyń joǵary sport sheberligi mektebiniń shákirti. Ol tek jarysqa qatysyp qana qoımaı, óz týǵan aýylynda balalardy jattyqtyrady. Álem chempıonynyń basty tálimgeri - týǵan ákesi Dáribaı Ospanov. Ol - 70 jasynda halyqaralyq jarystarda ardagerler arasynda júldeli oryn alǵan myqty sportshy.
