Qaraǵandylyq sportshy aýyr atletıka boıynsha 7 rekord ornatty
QARAǴANDY. QazAqparat - Qaraǵandylyq sportshy jasóspirimder arasynda aýyr atletıkadan Qazaqstannyń jeti rekordyn ornatty, dep habarlaıdy QazAqparat tilshisi.
Qyzylorda qalasynda 20 jasqa deıingi jasóspirimder men boıjetkender arasynda aýyr atletıkadan Qazaqstan chempıonaty ótti. Saıysta elimizdiń 14 oblysynan, Nur-Sultan jáne Almaty qalalarynan kelgen 18 komanda baq synady. Dodaǵa barlyǵy 200-den astam sportshy qatysty. Alty kún boıy jasóspirimder arasynda kil myqtyny anyqtaý úshin qyzý kúres júrdi.
Bul saıysqa Qaraǵandy oblysynan on sportshy qatysty. Oblystyq keshendi sport mektebiniń ókili, halyqaralyq dárejedegi sport sheberi Artem Antropov 96 kg salmaq dárejesindegi jasóspirimder arasynda julqı kóterýde - 155 kg, oqys serpýde - 205 kg jáne qossaıys boıynsha - 360 kg kóterip, jeti márte Qazaqstan rekordyn jasady.
Artem Antropov Qazaqstan chempıonatynda altyn medal jeńip aldy. Atalmysh jarystardyń nátıjesi boıynsha jáne QR Ulttyq quramasynyń sapynda ol Novı Izvor qalasyna (Bolgarııa) oqý-jattyǵý jıynyna shaqyrý aldy. Onda Artem maýsym aıynda Fıdjı aralynyń astanasy Sýva qalasynda ótetin jasóspirimder arasyndaǵy álem birinshiligine daıyndalady. Bolashaǵy zor jas sportshyny Ivan Sergeevıch Snegýrov jattyqtyrady.
Qaraǵandylyq boıjetkender de Qazaqstan chempıonatynda nátıjeli óner kórsete bildi. Ekinshi oryndy oblystyq keshendi sport mektebiniń tárbıelenýshisi Aısha Omarova jáne Temirtaý qalasyndaǵy OROMMIK shákirti Sofıa Loos ıelendi. Qola medaldi Metallýrgter qalasynyń sportshysy Ekaterına Serıakova jeńip aldy.
Foto: ekaraganda.kz
