Qaraǵandylyq sportshy aýdaryspaqtan Azııa chempıony atandy
QARAǴANDY. QazAqparat - Qaraǵandylyq sportshy QR Etnosport Qaýymdastyǵynyń jastar arasynda aýdaryspaqtan uıymdastyrǵan І Azııa chempıonatynda birinshi oryndy ıelendi, dep habarlaıdy QazAqparat tilshisi.
Ulttyq at sporty túrlerinen jastar arasyndaǵy birinshi Azııa chempıonaty 16-21 sáýir aralyǵynda Almaty mańynda ótti. Jarys alǵash ret halyqaralyq deńgeıde uıymdastyrylǵan bolatyn. Kókpar, aýdaryspaq, teńge ilý jáne jamby atý birinshiligine Azııanyń 10-ǵa jýyq eliniń jastar qurama komandalary jınaldy. Olardyń arasynda Qazaqstan, Majarstan, Reseı, Qytaı, Mońǵolııa, Malaızııa, Túrkııa, Ózbekstan, Tájikstan, Aýǵanstan sportshylary boldy.
Sportshylar 7 kún boıyna ózara myqtyny anyqtaýmen boldy. Qaraǵandylyq Nurbek Amanjol aýdaryspaq boıynsha 50 keli salmaq dárejesinde Azııa chempıony atanyp, oǵan quny 400 000 teńgeniń kólemindegi sertıfıkat tabys etildi. Ol sondaı-aq osy jyldyń naýryz aıynda ótken jastar arasyndaǵy QR chempıonatynda 1 oryn alǵan bolatyn.
Nurbek Shet aýdanynyń balalar men jasóspirimder sport mektebiniń tárbıelenýshisi. Osy sport túrimen 5 jyl aınalysady. Jas sportshyny bapker Saǵat Tóleýov jattyqtyrady.
Chempıonattyń jalpy júlde qory 16 000 000 teńgeni qurady.
Jastar jyly aıasynda ótkizilgen jarystardy Úılestirý jáne yntymaqtastyq jónindegi Túrik agenttigi (TIKA) qoldady. Chempıonattyń basty seriktesi «Samuryq-Qazyna» ulttyq ál-aýqat qory.
Jarys qorytyndysy boıynsha, jalpy esepte Qazaqstan quramasy 1-oryndy ıelendi. 2 oryn - Mońǵolııa quramasyna jáne 3 oryn - Ózbekstan qurama komandasyna buıyrdy.
