Qaraǵandylyq sheneýnikter oqýshylardyń tamaǵyn «urlaǵan»
ASTANA. QazAqparat - Qaraǵandy oblysy Qarajal qalalyq soty bilim bóliminiń basshysy men ekonomıstine qatysty úkim shyǵardy, dep habarlaıdy QazAqparat tilshisi sottyń saıtyna silteme jasap.
Sotta QR QK 189-baby 3-bóliginiń 1, 2 tarmaqtarymen aıyptalǵan Qarajal qalasynyń bilim bóliminiń basshysy men ekonomıstine qatysty kinálaryn moıyndaý týraly protsestik kelisimmen túsken qylmystyq is qaraldy.
Atalmysh tulǵalar ózderiniń qyzmettik dárejesin paıdalanyp, memlekettik satyp alý shartyna baılanysty Qarajal qalasy men Jáırem kentiniń oqýshylarynyń tamaqtaryna bólingen memlekettiń 4914 400 teńge kólemindegi qarajatty ıelenip kelgen.
Sot aıyptaý úkimin shyǵaryp, árqaısysynyń bas bostandyǵyn 5 jylǵa shektep, múlkin tárkilep, bilim bóliminiń basshysyna memlekettik uıymdarda laýazymdyq qyzmet atqarýǵa ómir boıyna tyıym saldy. Memleketke keltirilgen shyǵyn sottalýshylar tarapynan tolyqtaı óndirildi.
Sottyń úkimi zańdy kúshine engen joq.
