Qaraǵandylyq sheneýnikter qoǵamdyq kólikterde júretin bolady
QARAǴANDY. QazAqparat - Qaraǵandy oblysynyń ákimi Erlan Qoshanov óziniń orynbasarlarynan kem degende aptasyna bir ret qoǵamdyq kólikte júrýdi talap etti, dep habarlaıdy óńir basshysynyń resmı saıty.
Apparattyq jınalysta ol Qaraǵandy qalasynyń ákiminen elektrondyq jol aqy júıesiniń engizilýine qatysty esepti talap etti:
«Biz bul týraly qańtarda aıtqan bolatynbyz. Sizder mamyrda iske qosamyz dep ýáde bergen bolatynsyzdar. Men bilemin - iske qostyńyzdar. Endi qandaı deńgeıde ekeni týraly málimdeńizder».
Qala ákiminiń aıtýynsha, qurylǵylardy ornatý jumystary aıaqtaldy. Ol atalmysh júıe jyl sońyna qaraı jumys isteı bastaıtynyna ýáde berdi.
- Biz barlyq jeńildik beriletin azamattar, áleýmettik kómek alatyndar tizimin rettedik. «KaR-Tel» kompanııasymen ınternet taratý jóninde kelisimshart jasaldy. Qyrkúıekten bastap júıege qyzmet kórsetýge baılanysty jumystar bastaldy. Shamamen 300-ge jýyq adam jumys isteıdi, ol - baǵdarlamalaýshylar, dıspetcherler, tehnıkter, - dep málim etti Nurlan Áýbákirov. «Jalpy, qurylǵylardy ornatýdy biz aıaqtadyq. Jeltoqsanda júıeni tolyqtaı iske qosamyz».
Erlan Qoshanov elektrondyq bıletteý júıesin engizýdi baqylaýdy jalǵastyrýdy tapsyrdy. Buǵan qosa, ol jolaýshylardy tasymaldaý sapasyna nazar aýdardy.
- Sizder nashar baqylaısyzdar. Taǵy da biz burynǵy jaǵdaıǵa oralyp kelemiz. Tazalyq, júıelilik jáne sypaıy qyzmet kórsetý sapasy - osynyń barlyǵyn qadaǵalaýdy jalǵastyrý qajet. Keste qurýdy tapsyramyn: meniń orynbasarlarym, basqarma basshylarynan bastap, barlyǵyn baǵdarlar boıynsha bólip tastańyzdar, qoǵamdyq kólikpen júrsin. Ol tizimge Qaraǵandynyń ákimin de engizińizder, óz orynbasarlarymen birge júrsin. Sheneýnikter qoǵamdyq kólikte júrgen ár saparlaryn sıpattaýlary tıis, - dedi Erlan Qoshanov qala basshysyna.
