Qaraǵandylyq sheneýnikter arasynda zań buzýshylyq azaıdy
Qazaqstan Respýblıkasy Memlekettik qyzmet isteri jáne sybaılas jemqorlyqqa qarsy is qımyl agenttiginiń Qaraǵandy oblysy boıynsha Departamentinde Ádep keńesiniń 2018 jylda atqarǵan jumystarynyń qorytyndylary boıynsha brıfıng ótti. Sońǵy málimetterge saı, memlekettik qyzmettegi ádeptilik deńgeıiniń ósýi baıqalady. Mysaly, eger Tártiptik keńes jumys jasaǵan 2015 jyly qaralǵan tártiptik isterdiń úlesi 60%-dy (53 is) quraǵan bolsa, 2018 jyly Ádep keńesimen qaralǵan tártiptik isterdiń úlesi tek 32%-dy (25 is) qurady.
Alaıda, memlekettik qyzmetshilerdiń qyzmettik etıka normalaryn buzý faktileri de kezdesedi. Máselen, 2018 jyly Ádep keńesiniń usynysy boıynsha 24 laýazymdy tulǵa ártúrli tártiptik jaýapkershilikke tartyldy. Onyń ishinde 9-y qyzmettik ádep normalaryn buzǵany úshin jáne 15-i memlekettik qyzmettiń bedelin túsiretin teris qylyqtar jasaǵany úshin jaýapkershilikke tartyldy.
Sonymen birge, Ádep keńesimen memlekettik qyzmetshilerdiń quqyǵyn saqtaý, onyń ishinde zańsyz artyq jumys isteý faktilerine jol bermeý máseleleri qaraldy. Memlekettik organdardyń jumys tártibine sáıkes memlekettik qyzmetshilerdiń jumys kúni 8 saǵatty quraıdy. Іs júzinde ústeme jumys ádette ótelmeıdi jáne keıde ruqsat berilgen normalardan asyp ta ketedi (bir kúnde 2 saǵattan artyq).
Búgingi tańda artyq jumys isteý faktilerine jol bermeý boıynsha qabyldanǵan sharalar jalpy alǵanda oń nátıjeler kórsetip otyr. Júrgizilgen saýalnama nátıjesi boıynsha memlekettik organdardaǵy artyq jumys isteýdiń tómendeý dınamıkasy baıqalady. Sondaı-aq artyq jumys isteýdiń tómendeýine qoljetimdilikti baqylaý men basqarý júıesin engizýdiń tıimdi áser etkendigin aıta ketý qajet.
Tájirıbe kórsetip otyrǵandaı, atalmysh júıe artyq jumys isteý faktilerin aıtarlyqtaı tómendetýge múmkindik berdi. Qazirgi tańda júıe 81 memlekettik organǵa engizildi.
Artyq jumys isteýmen kúresýdiń taǵy bir joly -jumys kúni aıaqtalǵannan keıin kompıýterlerdi avtomatty túrde óshirý júıesi bolyp tabylady. Qajet bolǵan jaǵdaıda qyzmetkerler kompıýterleriniń jumysyn tek memlekettik organ basshylarynyń ruqsatymen ǵana uzartýǵa quqyly. Qazirgi kúni kompıýterlerdi óshirý júıesi 125 memlekettik organdarda ornatylǵan. Atalmysh júıe ákimshilik shyǵyndarǵa, atap aıtqanda elektr energııasyn tutynýdyń, tehnıkalyq quraldardyń tozýynyń tómendeýine jáne taǵy basqalarǵa da oń yqpalyn tıgizedi.
Sonymen qatar, artyq jumys isteý faktilerin joıý maqsatynda turaqty negizde memlekettik organdardy ınspektsııalaý júrgiziledi. Máselen 2018 jyly memlekettik qyzmetshilerdiń 255 artyq jumys isteý faktileri anyqtaldy.
Barlyq jaǵdaıda da memlekettik qyzmetshilerdiń quqyǵy qalpyna keltirildi.
