Qaraǵandylyq sheneýnik ózine 1 mln 260 myń teńge syıaqy taǵaıyndaǵan
QARAǴANDY. QazAqparat - 1 mıllıon 260 myń 224 teńge kóleminde óz-ózine syıaqy taǵaıyndap alǵan Qaraǵandy oblystyq jerdiń paıdalanylýy men qorǵalýyn baqylaý basqarmasy basshysynyń isi áshkere boldy, dep habarlaıdy «QazAqparat» HAA tilshisi.
Sheneýniktiń óz-ózine syıaqy taǵaıyndaıtyndaı quqy bolmaǵan. Sebebi, budan buryn ol sógis alǵan. Al zań tártiptik sógis alǵan adamǵa syıaqy berýge ruqsat etpeıdi.
«Tekserý qorytyndysy kórsetkendeı, basqarma basshysy Saıash Ahmetov tártiptik sógistiń kúshi joıylmaǵanyna qaramastan, óz buıryǵymen óz-ózine 1 260 224,47 teńge kóleminde syıaqy aýdarǵan. Alaıda Úkimet qaýlysymen bekitilgen «Syıaqy erejeleriniń» 4 pýnktine sáıkes, tártiptik sógistiń kúshi barda jumysshyǵa syıaqy berilmeıdi», - dep habarlaıdy QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Qaraǵandy oblysy boıynsha departamentiniń ókili Aıdyn Smaǵulov tártip keńes otyrysynyń barysynda.
Ózin-ózi syıaqymen kótermelegen sheneýnik aıybyn moıyndap, ókinishin bildirgen. Aqshanyń jartysyn bıýdjetke qaıtaryp beripti. Biraq, 750 224 teńge mólsherindegi negizgi qaryz áli qaıtarylǵan joq. Bul somany basqarma basshysy kelisilgen keste boıynsha tóleıtin bolady. Biraq, sanktsııa munymen shektelip qalmady. Sheneýnik báribir tártiptik sógisten qutyla almady.
Tártip jónindegi Keńes tóraǵasy, QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Qaraǵandy oblysy boıynsha departamentiniń basshysy Jandos Sársenovtyń aıtýynsha, óziniń áreketimen basqarma basshysy «Memlekettik qyzmet týraly» zańdy buzyp, óziniń materıaldyq múddesi úshin qyzmettik laýazymyn paıdalanǵan. Keńes músheleri sheneýniktiń ústinen qaraıtyn basshylyqqa onyń tolyq emes qyzmettik sáıkestigi boıynsha jaýapkershilikke tartý týraly keńes berýdi durys dep sheshti.
