Qaraǵandylyq sheneýnik kásipkerlerdi kirgizbeý úshin kabınetin ishinen qulyptap alǵan

QARAǴANDY. QazAqparat - Qaraǵandy oblysy boıynsha Qazaqstan Respýblıkasy Memlekettik qyzmet isteri jáne sybaılas jemqorlyqqa qarsy is-qımyl departamenti memlekettik sáýlet-qurylys baqylaý basqarmasy basshysynyń mindetin atqarýshyǵa qatysty qyzmettik tergeý júrgizdi. 

Sheneýnik kelýshilerdi qabyldaý kezinde kabınetinde qamalyp, esigin ashpaı qoıǵan, dep habarlaıdy QazAqparat tilshisi.

Qyzmettik tergeý barysynda 2018 jyldyń 9 aqpanynda eki kásipkerdiń T. Núrkenovtiń qabyldaýyna kire almaǵandary belgili boldy. Basqarma hatshysy qonaqtar qabyldaý bólmesine kelgen sátte olarǵa qatysty shara qoldaný maqsatynda polıtsııa qyzmetkerlerin shaqyrǵan. Al qabyldaý bólmesinde kútken kezde Núrkenovtiń esigi ishinen jabylyp turǵan. Bul jaǵdaı basshyǵa kelgenderdiń narazylyǵyn týdyrdy.

Kásipkerler bolǵan oqıǵa jaıynda áleýmettik jelilerge jazyp, sheneýniktiń áreketine Departamentke shaǵymdanǵan. Tekseris barysynda T. Núrkenov atalmysh azamattar arnaıy qabyldaý kúni kelmegenderin jáne dál sol sátte shuǵyl tapsyrma oryndap otyrǵandyqtan ishke kirgize almaǵanyn aıtty.

Ádep jónindegi keńes músheleri sheneýnikke qatysty eskertý túrindegi tártiptik jaza qoldanýǵa sheshim qabyldady.