Qaraǵandylyq sheber Eýrazııalyq dızaınerler odaǵynyń halyqaralyq kórmesine qatysty
QARAǴANDY. QazAqparat – Eýrazııalyq dızaınerler odaǵynyń Halyqaralyq retrospektıvti kórmesiniń ashylýynda Qaraǵandy sýretshisi Evgenııa Shýltske QR Premer-Mınıstriniń orynbasary atynan alǵys hat, qoldan jasalǵan biregeı shapan jáne halyqaralyq mańyzy bar dıplom tabys etildi, dep habarlaıdy QazAqparat tilshisi.
Kórmeniń basty maqsaty – qazaqstandyq dızaınerler men sýretshilerdi álemdik naryqqa shyǵarý, sondaı-aq, álemdik qaýymdastyqta Qazaqstannyń salt-dástúrin, ádet-ǵurpyn, mádenıetin jáne kórikti jerlerin nasıhattaý. Qazaq halqynyń barlyq mádenı san alýandyǵy Evgenııa Shýltstiń kóptegen eńbekterinde kórinis tapqan. Onyń kıizden jasalǵan sýretteri Qazaqstannan tys jerlerde de tanymal.
Sonymen qatar, sýretshi Qaraǵandyda Qazaqstan halqy Assambleıasy janyndaǵy «Shabyt» ortalyǵynda sándik-qoldanbaly óner oqytýshysy retinde tanymal.
Kórmede Evgenııa Shýlts birneshe jumystaryn usyndy. Bul qolmen óńdelgen júnnen jasalǵan «Ǵasyrlar danalyǵy» taqyryptyq trıptıhi, oıýlarmen órnektelgen súıekter, ań terisinen jasalǵan «Uıqy aýlaýshy» etnıkalyq paneli,
«Jer Sý», «Úıge qaıtar jol» jáne «Máńgilik mahabbat áni» kıiz sýretteri.
«Qaraǵandylyq sýretshilerdiń jumystaryn kórermender qyzyǵýshylyqpen qabyldady. Meniń sýretterimniń arasynda kórermenderge kóbine «Jer Sý» unady. Men úshin bul tarıhı derekter men zamanaýı kózqarastyń qyzyqty sıntezi.
Maǵan bul sýretti jasaýǵa «Sýaıchınnıkı» belarýs etnomádenı birlestiginiń ókilderi kómektesti», – dep bólisti Qazaqstan Dızaınerler odaǵynyń múshesi Evgenııa Shýlts.
Evgenııa otandyq dızaınerlerdiń sheberliginiń joǵary deńgeıin atap ótti. Aıta keter jaıt, kórmege biregeı zergerlik buıymdar men súıek oıýlary qoıylǵan. Sondaı-aq, munda qazaq ulttyq áýenderimen jáne kómeımen án salýmen kásibı tańdalǵan mýzykalyq súıemeldeýmen etnostyq kollektsııalardyń erekshe defıleleri ótti.
«Defılege qatysýshylardyń kostıýmderi bizdiń elimizdiń ejelgi dáýirden bergi tarıhynyń birneshe kezeńin beınelegeni maǵan óte unady. Biraq men úshin kútpegen tosyn syı Eraly Toǵjanovtyń alǵys haty men bısermen kestelengen barqyt shapandy tabystaý boldy. Bul-mańǵystaýlyq sheberlerdiń erekshe týyndysy.
Men ózim eksklıýzıvti kıim jasaýmen aınalysamyn, sondyqtan syılyqtyń qundylyǵyn birden túsindim. Shynymdy aıtsam, men qatty qobaljydym.
Órnektelgen, qolmen kestelengen bul buıymdy jasaýǵa sheber kem degende jarty jyl ýaqytyn jumsaıdy», – deıdi sýretshi.
Qazaqstandyq dızaınerler úshin uıymdastyrylǵan aýqymdy shara elordada 25 maýsymǵa deıin jalǵasady.
