Qaraǵandylyq sheber aǵashtan tanymal tulǵalardyń músinderin jasaıdy
QARAǴANDY. QazAqparat - Qaraǵandylyq sheber Kákish Amantaı Buqar jyraýdyń 350 jyldyǵyna balqaraǵaıdan 20 shaqty tarıhı tulǵanyń músinin jasap shyqty, dep habarlaıdy QazAqparat tilshisi.
Sheber osydan 15 jyl buryn kishigirim músinderdi jasaý isine qyzyǵa bastaǵan. Bastapqyda jumystary adamdardyń qyzyǵýshylyǵyn tanytady dep oılamaǵan. Qarapaıym aýyl turǵyny Amantaı Kákishtiń sheberlik isi osylaısha bastaý alǵan. Er adam jumystaryn balqaraǵaı aǵashynan jasaıdy.
«Men bul ispen 15 jyldan astam ýaqyt aınalysyp kelemin. Búgin Buqar jyraýdyń 350 jyldyǵyna arnaıy kólemi kishkentaı 20 músin daıyndadym. Buqar jyraý beınelengen músinderdi eki ústelge jaıyp tastadym», - dedi Amantaı Kákish.
Budan bólek, sheber keleshekte ártúrli kórmelerge qatysýdy josparlap otyr.
Onyń aıtýynsha, bir músindi daıyndaýǵa eki kún ketetin kórinedi.
«Mende qazir shamamen ártúrli 50 músin bar. Olardyń arasyndaǵy eń tanymaldary - úsh bıimiz, Qajymuqan, Abylaı han men qazaq batyrlary beınelengen músinder. Ulym da bul kásipke qyzyǵýshylyq tanytady, qolynan shyqqan týyndylary jaman emes», - dedi sheber.
Sheberdiń bir týyndysy 5 myń teńge turady. Alaıda er adam búgin jumystaryn satpaı, tek jurtshylyqtyń nazaryna usynýdy jón kóripti.
