Qaraǵandylyq sharýalar dándi daqyl men zyǵyrdan mol ónim alýdy kózdep otyr
QARAǴANDY. QazAqparat – Jazdyń tym qurǵaq bolǵanyna qaramastan Qaraǵandy oblysy Buqar jyraý aýdanynyń fermerleri egin bıyl jaqsy shyǵady dep boljam jasap otyr, dep habarlaıdy QazAqparat tilshisi.
Oblys ákiminiń orynbasary Serik Shaıdarov aýdannyń egistikterinde bolyp, ósimdikterdiń jaı-kúıin qarap shyqty.
Ol sondaı-aq malǵa jem daıyndaý barysymen tanysty.
Doskeı aýylynda «Strelets» sharýa qojalyǵy dándi daqyldardan basqa zyǵyr ósiredi.
Sharýashylyq basshysy Nıkolaı Vasılchenkonyń aıtýynsha, bul daqyl 240 ga jerge egildi jáne ónim kólemi byltyrǵy jyldan artyq bolady dep kútilýde.
Semizbuǵa aýylyndaǵy «Jeldibaı» sharýa qojalyǵy 1 500 ga egistikti óńdeıdi, al jalpy jer kólemi – 3 300 ga.
Kásiporyn mal sharýashylyǵyna mamandanǵan jáne óz qajettilikteri úshin dándi jáne shópti ósimdikterdi ósiredi.
Bar astyq qoımasy iske qosyldy. Memlekettik qoldaýdyń arqasynda aýyl sharýashylyǵy tehnıkasy jańartyldy.
Serik Shaıdarov Tasshoqy aýylyndaǵy «Marat» ShQ, Aqjar aýylyndaǵy «Jalǵas» ShQ boldy. Ol aýyl turǵyndarynyń mal azyǵyn jınaǵanyna kóz jetkizdi.
Jumys sapary barysynda ákim orynbasary «Aýyl – el besigi» arnaıy jobasynyń júzege asyrylý barysyn tekserdi.
Botaqara kentinde 320 oryndyq dene shynyqtyrý-saýyqtyrý kesheni salynýda.
Baǵdarlama boıynsha aýdanda alty joba qarjylandyryldy.
Bul - Kókpekti jáne Tokarevka mektepterin, Rostov mektep janyndaǵy ınternatyn kúrdeli jóndeý. Baımyrzada Mádenıet úıi men aýyl ishindegi joldar jóndelip jatyr.
Serik Shaıdarov aýdan basshylyǵyna kúndelikti jumys sapasyn baqylap, kesteden qalys qalmaýdy tapsyrdy.
