Qaraǵandylyq sham shyǵarýshylar Mordovııadaǵy ǵylymı alańdy paıdalanbaq
ASTANA. QazAqparat - Qaraǵandy oblysynyń kásipkerler delegatsııasy bıznes-mindetpen Mordovııa Respýblıkasynyń astanasy - Saranskide bolyp qaıtty. Sapardyń nátıjesinde agroónerkásip kesheninde jáne jaryq texnıkalyq ónerkásipte iskerlik baılanysty keńeıtý týraly kelisim jasaldy, dep habarlaıdy oblystyq ákimdiktiń baspasóz qyzmeti.
Bıznes-mindetti Mordovııa Respýblıkasynyń ónerkásip, ǵylym jáne jańa texnologııalar mınıstrliginiń járdemdesýimen Eksportty qoldaý ortalyǵy uıymdastyrdy.
- 20-dan astam jaryq texnıkalyq, kabeldik jáne taǵamdyq kásiporyndar qazaqstandyq áriptesterimen seriktesip jumys isteýge nıet bildirdi. Eksportty qoldaý ortalyǵy men Qaraǵandy oblysynyń Kásipkerler palatasy bıznes úshin iskerlik baılanysty keńeıtýge kómek kórsetýge baǵyttalǵan ózara qarym-qatynas týraly kelisimge qol qoıdy, - deıdi Aımaqtyq kásipkerler palatasynyń jobalardy súıemeldeý bóliminiń jetekshisi Álibek Momynbekov.
Saranskide qaraǵandylyqtar A. N. Lodygın atyndaǵy jaryq kózderin ǵylymı-zertteý ınstıtýtynyń múmkindikterimen tanysyp qaıtty.
Eki jaq ta qyzyǵýshylyq bildirýde: ǴZI jaryq shamdaryn qazaqstandyq naryqqa jetkizý ádisterin izdestirýde, al qaraǵandylyqtarǵa óz ónimderin synaqtan ótkizýge arnalǵan akkredıttelgen zertxana qajet.
Eki respýblıka kásipkerleri arasynda eki jaqtyq kelissózder júrgizildi. Qazaqstan Mordovııanyń iri seriktesteriniń biri bolyp tabylady, respýblıkanyń jalpy eksportynyń 21% úlesi bidiń elge tıesili.
