Qaraǵandylyq shahterler Gennadıı Golovkınge qoldaý bildirdi

NUR-SULTAN. QazAqparat - Qaraǵandylyq shahterler Gennadıı Golovkınge qoldaý bildiretin fleshmobty bastady, dep habarlaıdy QazAqparat «ArselorMıttal Temirtaý» AQ baspasóz qyzmetine silteme jasap.

«Gennadıı, men seniń ákeńmen Qaraǵandy shahtasynda uzaq jyl jumys istegenmin. Talaı ret jer astyna tústik. Ákeńniń myqty, qaıratty jan ekeni kórinip turatyn. Sendeı uldy tárbıelep ósirgeni de tegin emes. Biz saǵan jankúıermiz, biz seni jaqsy kóremiz. Ata-babańnyń, ákeńniń rýhy qoldasyn. Senen tek jeńis kútemiz», - deıdi kenshiler.

Eske salaıyq, Golovkın-Rolls jekpe-jegi 8 maýsym kúni Nıý-Iork qalasyndaǵy «Madison Square Garden» arenasynda ótedi. Kezdesý aralyq salmaq - 164 fýntta (74,3 kg) ótedi. Gennadıı úshin bul kezdesý eki sebeppen erekshe bolmaq. Birinshiden, jańa bapkeri Djonatan Beenkspen alǵashqy aıqasy. Ekinshiden, jýyrda tıimdi kelisimshartqa qol qoıǵan DAZN strımıngilik platformasyndaǵy tuńǵysh jekpe-jegi.

Boks keshin qazaqstandyqtar Qazsport telearnasynan tikeleı efırden kóre alady. Bastalýy - 9 maýsym, Nur-Sultan qalasynyń ýaqytymen tańǵy saǵat 06:00.

Aıta keteıik, keshtiń anderkartynda qazaqstandyqtar Álı Ahmedov amerıkalyq Markýs MakDenıelmen (15-0, 2KO), Baqtııar Eıýbov AQSh-tyń taǵy bir ókili Braıan Sebalomen (8-0, 4KO) kezdesedi.

Á.Ahmedov WBC tıtýly úshin synǵa túsedi.