Qaraǵandylyq shahter Tokıo Olımpıadasyna qatysýy múmkin
QARAǴANDY. QazAqparat - «ArselorMıttal Temirtaý» AQ «Tentek» shahtasynyń taý-ken sheberi Danıl Polıanskıı jumysy men sportty qosa alyp keledi, dep habarlaıdy óńir basshysynyń resmı saıty.
Ol kásibı túrde jeńil atletıkamen aınalysady.
Kenshi-sportshy olımpıada chempıony Olga Rypakovanyń syılyǵyna arnalǵan Halyqaralyq týrnırde altyn medal utyp enshiledi. Danıl Polıanskıı syryqpen sekirýde 5.35 metr bıiktikti baǵyndyryp, birinshi oryn aldy. Chempıondy Vasılıı Karpov jattyqtyrady.
- Sportpen qatar shahtadaǵy jumysymdy birge alyp júrý óte qıyn, alaıda ázirge qolymnan kelip otyr. Men ózim kenshiler áýletinen shyqqanmyn. Shahtınskide dúnıege keldim. Ákem 34 jyl úńgýshi bolyp jumys istedi, úlken aǵam Lenın shahtasynda - taý ken jumyskeri. Atam da kenshi bolǵan. Meniń sporttaǵy maqsatym - 2020 jyly Tokıoda ótetin olımpıadaǵa lıtsenzııa alý, - deıdi Danıl Polıanskıı.
Qazir ol 27 jasta. Qaraǵandy memlekettik tehnıkalyq ýnıversıtetin támamdaǵan soń shahtaǵa jumysqa ornalasqan.
Naýryzda ult quramasynyń quramynda Danıl Polıanskıı Túrkııaǵa Azııa chempıonatyna daıyndalýǵa attanady. Atalmysh saıys kelesi jyldyń sáýirinde Katarda ótedi.
