Qaraǵandylyq psıhologtar pedofıldiń jalpy portretin jasady
QARAǴANDY. QazAqparat – Qaraǵandy oblysy boıynsha QAJD psıhologııalyq qyzmetiniń qyzmetkerleri óz zertteýlerin júrgizdi. Mamandar seksýaldyq sıpattaǵy qylmystary úshin sottalǵan qylmyskerlerdiń belgili bir uqsastyǵyn atap ótti, dep habarlaıdy QazAqparat tilshisi.
Qaraǵandy oblysynyń kolonııalarynda kámeletke tolmaǵandarǵa qatysty seksýaldyq sıpattaǵy qylmystar úshin eki júzge jýyq adam jazasyn óteıdi.
Psıhologtar árbir sottalǵan azamatpen jeke dınamıkalyq jumys júrgizedi.
Psıhologııalyq áńgimeler ótkiziledi, jeke ister zertteledi, testileý júrgiziledi, bul jumystardyń barlyǵy psıhologııalyq portretti jasaý úshin qajet.
Alynǵan aqparat osy sanattaǵy adamdarmen jeke jumys jasaý úshin negiz bolyp tabylady.
Sonymen qatar, Qaraǵandy oblysynyń mekemelerinde qylmystyq jazasyn ótep jatqan kámeletke tolmaǵandarǵa seksýaldyq sıpattaǵy qylmys jasap sottalǵan adamdardyń belgili bir uqsastyqtary bar.
Máselen, kóp jaǵdaıda balalarǵa qatysty jynystyq sıpattaǵy qylmystar sáýir jáne mamyr aılarynda jasalady, eń azy - aqpan aıynda.
Sottalǵandardyń kópshiliginiń óz balalary bar, 75% - buryn sottalmaǵan.
Sottalǵandardyń ortasha jasy - 32,5. Bul rette osy qylmys úshin sottalǵannyń eń jasy – 17 jasta, al eń úlkeni – 59 jasta.
Negizinen bul er adamdar tolyq otbasynda tárbıelengen jáne jalǵyz bala bolǵandar.
Kóp jaǵdaıda zııandy ádeti bar jáne zańdy nemese azamattyq nekede turmaıtyn, ártúrli jumysshy kásibine jumysqa ornalasqandar.
«Osy sanattaǵy sottalǵandar jeke temperamenttiń melanholııalyq nemese flegmatıkalyq túrine, al konstıtýtsııalyq tıpologııaǵa sáıkes astenıkterge jatady. Sonymen qatar, zerttelgen sottalǵandardyń kópshiliginde balalyq shaqta bastan keshken psıhologııalyq jaraqattary bar», - dedi Qaraǵandy oblysy boıynsha QAJD aǵa psıholog ınspektory, ádilet kapıtany Ekaterına Chernyshova.
