Qaraǵandylyq polıtseılerge baılanysty qylmystyq is toqtatyldy
QARAǴANDY. QazAqparat - Óz-ózine qol salyp, jáne buǵan polıtseıler kináli dep hat jazyp ketken qaraǵandylyq azamattyń ólimine baılanysty qylmystyq is toqtatyldy, dep habarlaıdy «QazAqparat» HAA tilshisi.
Polıtsııa bóliminen shyqqan soń garajynda atylyp qalǵan Ardaq Jumkeshovtiń isi qoǵamda úlken talqylaýǵa túsken bolatyn. Qaraǵandydaǵy arnaıy prokýrorlar basqarmasynyń prokýrory atalǵan iske baılanysty bes polıtsııa qyzmetkeri Ardaq Jumkeshovty ózin-ózi óltirýge májbúrlegen joq degen sheshimge keldi.
«Qylmystyq tártip buzýshylyq quramy bolmaǵandyqtan sotqa deıingi tergeý toqtatylsyn», - dep jazylǵan Qaraǵandy oblystyq prokýratýrasynyń qaýlysynda.
Esterińizge sala keteıik, kólikti iship alyp basqarǵan júrgizýshini polıtsııa qyzmetkerleri toqtatqan.
Tártip saqshylarynyń aıtýynsha, júrgizýshi taksımen ne bolmasa qoǵamdyq kólikpen qaıtýdan bas tartyp birneshe ret judyryǵyn da siltegen. Budan keıin Ardaq Jumkenov polıtsııa bólimshesine jetkiziledi. Hattama toltyrylyp, júrgizýshiniń ishimdik ishkeni anyqtalǵan soń, oǵan QR QK 293 baby «Buzaqylyq» boıynsha is qozǵalady. Júrgizýshi úıine qaıtarylyp, onyń kóligi aıyp turaǵyna qoıylady. Budan soń júrgizýshi 14 shaǵyn aýdandaǵy garajyna baryp atylyp qalǵan. Alaıda, marqumnyń anasy ulynda buryn eshqandaı qarýdyń bolmaǵanyn aıtyp otyr. Óziniń qoshtasý hatynda ol bárine kináli ózin jolda toqtatqan polıtseı men onyń janyndaǵy tórt áriptesi ekendigin jazyp ketken.
