Qaraǵandylyq polıtseılerge 80-nen astam qyzmettik kólik tabys etildi
QARAǴANDY. QazAqparat - Búgin Qaraǵandy oblysynyń ákimi Erlan Qoshanov oblystyq PD qyzmetkerlerine 86 qyzmettik kóliktiń kiltin tabys etti. Saltanatty shara Qazaqstan polıtsııasy kúnine oraılastyryldy, dep habarlaıdy QazAqparat tilshisi.
Qaraǵandy oblysy polıtsııa departamentiniń avtoparki 86 qyzmettik avtokólikpen tolyqty. Búgin Qaraǵandy oblysynyń ákimi Erlan Qoshanov oblystyq polıtsııa departamentiniń bastyǵy, polıtsııa polkovnıgi Erlan Faızýllınge jańa arnaıy mashınalardyń kiltterin tabys etti. Kólikter jol-patrýl qyzmeti men jergilikti polıtsııa bólimshelerine beriledi.
«Kásibı merekelerińizben quttyqtaımyn. Elimizdiń ár azamatynyń turaqtylyǵy men tynyshtyǵy - sizderdiń eren eńbekterińizdiń nátıjesi. Turǵyndar ártúrli ómirlik jaǵdaılarda birinshi kezekte sizderge júginedi. Kúndiz de, túnde de sizder aldyńǵy qatardasyzdar», - dedi oblys ákimi Erlan Qoshanov.
Óńir basshysy egemendi Qazaqstannyń barlyq jetistikteri tártip saqshylarymen tyǵyz baılanysty ekenin atap ótti. Prezıdent tapsyrmasy boıynsha óńirde polıtsııa departamenti bólimsheleriniń materıaldyq-tehnıkalyq bazasyn nyǵaıtý boıynsha tıimdi sharalar qabyldanýda, bul oblysta quqyqtyq tártip ornatý úshin birlesken jaýapkershiliktiń jańa mindetterin alǵa qoıady.
«Bizge bólingen qarajattyń 90%-y jergilikti polıtsııa qyzmetin jaraqtandyrýǵa ketedi. Birinshi kezekte bul - planshetter, beınetirkegishter, protsessorlar. Sondaı-aq, kólik. Ókinishke qaraı, olar ýaqyt óte kele tozady. Biraq, sońǵy úsh jylda oblys ákiminiń arqasynda polıtsııa qyzmetine bólinetin qarajat kólemi anaǵurlym ulǵaıǵanyn atap ótkim keledi. Biz ol úshin úlken alǵysymyzdy bildiremiz», - dedi Qaraǵandy oblysy polıtsııa departamentiniń basshysy Erlan Faızýllın.
«Kia», «Nıva» jáne «Sobol» markaly qyzmettik avtomobılder daýys zoraıtqysh qurylǵymen, radıostansamen jáne basqa da qajetti quraldarmen jabdyqtalǵan. Saltanatty is-sharadan keıin avtokólikter qyzmet atqarý oryndaryna shyqty.
