Qaraǵandylyq polıtseıler jyl sońyna deıin bir-bir planshetten alady
ASTANA. QazAqparat - Qaraǵandy oblysynda jol-patrýldik polıtsııa qyzmetkerleri jyl sońyna deıin túgel planshettermen qamtylatyn bolady. Bul týraly Óńirlik kommýnıkatsııalar qyzmetinde ótken brıfıngte oblystyq ІІD Jergilikti polıtsııa qyzmetiniń bastyǵy Jalǵasbaı Jaqaev aıtty.
Qaraǵandy oblysy ákimdiginiń baspasóz qyzmetinen málim etkendeı, Jalǵasbaı Jaqaev Quqyqtyq statıstıka jáne arnaıy esep jónindegi komıtette jasalǵan «Ákimshilik quqyq buzýshylyqtardyń biryńǵaı tizilimi» (ÁQBBT) júıesiniń qalaı jumys isteıtindigi týraly aıtyp berdi.
Jol-patrýldik polıtsııa ınspektory planshettiń kómegimen elektrondy hattama toltyra alady. Jáne de qujat birden respýblıkalyq málimetter bazasyna túsedi de ekinshi deńgeıli bankterde kórsetiletin bolady. Bul ereje buzýshyǵa hattama toltyrylǵan bette aıyppuldy óteýge múmkindik beredi.
«Bul pılottyq joba oblysta ótken jyldyń jeltoqsanynan beri jumys isteı bastady. Búgingi tańda bizdiń qyzmetkerlerde 50 planshet bar. Biraq osy jyldyń sońyna deıin jol polıtsııasynyń barlyq qyzmetkerlerin planshettermen qamtamasyz etetin bolamyz», - dedi Jergilikti polıtsııa qyzmetiniń bastyǵy.
Al jergilikti polıtsııa qyzmeti bastyǵynyń orynbasary Oljas Arynov mundaı múmkindik paıda bolǵaly, birde bir ereje buzýshy aıyppuldy ornynda tólemegenin aıtady.
«Búgingi tańda Forte bankpen termınaldar men tólem júıelerin paıdalaný týraly memorandýmǵa qol qoıyldy. Qoldarynda planshetteri bar qyzmetkerler ereje buzǵan júrgizýshige kez kelgen bank kartasy arqyly aıyppuldy sol jerde tólete alady. Mundaı jaǵdaıda termınaldyń kómegimen aıyppuldy 50% jeńildikpen óteýge bolady», - dedi Oljas Arynov.
Polıtseıler aıyppuldy birneshe tásilmen tóleýge bolatynyn eske salady: qolma-qol aqshamen ekinshi deńgeıli bankterde nemese «Qazposhta» bólimshelerinde, sondaı-aq Kaspi jáne QIWI ámııandary arqyly.
Sonymen qatar qolma-qol aqshasyz banktik kartadan egov.kz portalyna tirkelý arqyly tóleý balama ádisi de qoljetimdi. Sondaı-aq ekinshi deńgeıli bankterdiń ınternet-saıttary arqyly onlaın-tólem jasaýǵa bolady: mysaly, Qazkom tólem kartasynyń ıeleri aıyppuldy homebank.kz saıtynda óteı alady. Jáne de aıyppuldy egov.kz, HandyPay, MyPay mobıldik qosymshasy arqyly da tóleýge múmkindik jasalǵan.
Atalǵan ádister arqyly jol júrý erejesiniń aıyppuldaryn ótegen jaǵdaıda ákimshilik polıtsııa bólimshelerine tólemniń jasalǵany týraly túbirtek tapsyrýdyń qajeti joq. Ótelgen aıyppuldar týraly aqparat avtomatty túrde ІІM Ákimshilik quqyqbuzýshylyqty esepke alý aqparattyq júıesine jiberiledi.
