Qaraǵandylyq polıtseıler jolda qalǵan 18 jolaýshyny qutqardy
QARAǴANDY. QazAqparat – Qaraǵandylyq polıtsııa qyzmetkerleri jolaýshy tasymaldaıtyn shaǵyn avtobýstyń júrgizýshisine kómektesip, 18 adamdy qutqardy, dep habarlaıdy QazAqparat tilshisi.
27 qarasha kúni saǵat 17:00 shamasynda «Almaty-Ekaterınbýrg» avtojolynda qyzmet ınspektory polıtsııa aǵa leıtenanty Qusaev Ermek jáne polıtsııa leıtenanty Nurolla Bolatbek avtopatrýldeý kezinde «Mersedes spınter» avtokóligin baıqaǵan. Jolaýshylar tasymaldaıtyn shaǵyn avtobýs Qaraǵandy qalasyna qaraı baǵyttaǵy respýblıkalyq trassanyń 1060 shaqyrymynda buzylyp qalǵan. Avtokóliktiń salonynda 18 jolaýshy bolǵan. Birinshi kezekte polıtsııa qyzmetkerleri jolaýshylardyń qaýipsizdigin qamtamasyz etip, olardy Qaraǵandyǵa bara jatqan jolaı avtokólikterge otyrǵyzyp, evakýatsııalady. Odan keıin ınspektorlar «GAZel» avtokóligin toqtatyp, onyń júrgizýshisi synǵan avtokólikti jaqyn mańdaǵy tehnıkalyq qyzmet kórsetý stantsııasyna deıin súıretýge kelisken. Osylaısha polıtseıler 18 adamdy aıazdy kúni sýyqtan qutqardy.
Alaıda, bul jaǵdaı týraly polıtsııa basshylyǵyna ınspektorlardyń ózinen emes, júrgizýshi osyndaı kómek kórsetkeni úshin polıtseılerge alǵysyn bildirgen áleýmettik jelilerden málim boldy.
