Qaraǵandylyq polıtseıler janyp jatqan úıden úsh adamdy qutqardy
ASTANA. QazAqparat - Qaraǵandy oblysy ІІD bastyǵy polıtsııa general-maıory Mergenbaı Japparovtyń atyna Suryptaý stantsııasynyń turǵyny Aleksandr Maıorovtyń atynan alǵys hat kelip tústi. Hat avtory polıtseıler onyń otbasyn janyp jatqan úıdiń ishinen aman alyp qalǵany týraly baıandaǵan, dep habarlaıdy óńir basshysynyń resmı saıty.
Bul kúni ýchaskelik ınspektor, leıtenant Asyl Jumanov jáne serjant Serjan Tańatov Suryptaýdaǵy kóshelerdi patrýldeý barysynda bıik sharbaqpen qorshalǵan jeke úıden qara tútin shyǵyp jatqanyn baıqaǵan. Polıtseıler kóp oılanbastan qorshaýdan asyp ótken. Úıdiń esikteri jabyq bolǵan, al terezelerinde metall qorshaýlar ornatylǵan. Tártip saqshylary tordyń bireýin julyp alyp, ishke kirgen. Kók tútinge oranǵan bólmelerdiń ishinen olar úı ıesin, onyń áıeli men anasyn es-tússiz jaǵdaıda taýyp alǵan. Úı turǵyndaryn janyp jatqan úıden syrtqa alyp shyǵyp, polıtseıler órt sóndirý jáne jedel járdem qyzmetterin shaqyrǵan. Úı men onyń mańynda turǵan kólik tolyǵymen janyp ketti, alaıda adamdar tiri qaldy.
Bul oqıǵa 2017-shi jyldyń sońynda oryn alǵan, biraq Qaraǵandy oblysynyń ІІD basshylyǵy ol týraly tek alǵys hattan bilgen eken. Sońyra anyqtalǵandaı, polıtseıler óz áreketterin batyldyq dep eseptemeı, adamdardyń ómirin arashalap qalǵanyn eshkimge aıtpaǵan.
Qaraǵandy oblysynyń ІІD baspasóz qyzmeti habarlaǵandaı, qazirgi tańda erekshelengen qyzmetkerlerdi marapattaý týraly buıryq ázirlenip jatyr.
