Qaraǵandylyq polıtseıler ózine qol salmaq bolǵan qyzdy qutqaryp qaldy
14 qarashada saǵat 3.30 shamasynda Qaraǵandy qalasynyń PB patrýldik polıtsııa polkiniń aǵa ınspektory Talǵat Raıhanov pen ınspektor Nurbolat Seıtekke Nurken Ábdirov dańǵyly boıynda ornalasqan hımııalyq tazalaý nysanyna belgisiz bireý kirmek bolyp jatqany týraly habarlama tústi. Birer mınýttan keıin oqıǵa ornyna polıtsııa qyzmetkerleri jetti. Polıtsııany mekemede túngi aýysymda bolǵan eki jumysshy áıel shaqyrǵan.
«Syrtqy esikti bireý qaǵyp, jylaǵan adamnyń daýsy shyqty. Biraq biz esikti ashpadyq, polıtsııaǵa habarlasyp, sizderdiń kelýińizdi kúttik», - dep túsindirdi kýágerler.
«Meniń áriptesim sol jerde qalyp, men qolshamdy jaǵyp, irgeles aýmaqty aralaı bastadym. Órt sóndirýge arnalǵan satynyń astynan bir adamdy baıqadym. Jaqyndap kelsem, asylyp turǵan qyzdy kórdim – keıin belgili bolǵandaı, bul matadan jasalǵan belbeý eken. Men birden áriptesimdi ratsııa arqyly shaqyryp, qyzdy bosatyp aldyq. Osydan keıin qyzdy jerge jatqyzyp, alǵashqy medıtsınalyq kómek kórsete bastadyq», – deıdi T.Raıhanov.
Polıtsııa qyzmetkerleri alǵashqy kómek kórsetken kezde qyz tynystaı bastaǵan kezde, jedel járdem shaqyrǵan.
Dárigerler: «Eger polıtsııa birneshe sekýndqa keshigip qalsa, ony aman alyp qalý múmkin emes edi» dep málimdedi.
Qazirgi ýaqytta qyzdyń jaǵdaıy birqalypty. Polıtseıler onyń óz-ózine qol jumsaýyna ne sebep bolǵanyn anyqtap jatyr.
