Qaraǵandylyq polıtseıler mektep oqýshysyna shabýyl jasaǵan er adamdy ustady
QARAǴANDY. QazAqparat - Qaraǵandyda tártip saqshylary qala mektepteriniń birinde oqıtyn 14 jasar oqýshy qyz balaǵa shabýyl jasaǵan er adamdy ustady, dep habarlaıdy QazAqparat tilshisi.
16 naýryzda Qaraǵandy qalasy PB jedel basqarý ortalyǵyna jalpy bilim beretin mektepterdiń biriniń janynda belgisiz bireý 14 jastaǵy oqýshyǵa shabýyl jasaǵany týraly habarlama kelip tústi. Oqıǵa ornyna sanaýly ýaqytta Qaraǵandy qalasy PB Ortalyq polıtsııa bóliminiń jedel-tergeý toby keldi.
Jábirlenýshi sabaqqa bara jatqan kezde oqý ornynyń janynda belgisiz bireý oǵan shabýyl jasaǵanyn aıtty. Qaskúnem oqýshyny uryp, qashyp ketken.
«Jeke jedel-tergeý toby quryldy. Jedel-izdestirý sharalary barysynda krımınaldyq polıtsııa qyzmetkerleri Temirtaý qalasynyń 30 jastaǵy turǵynyn ustady. Sotqa deıingi tergeý barysynda kúdiktiniń áıelderge jasalǵan taǵy úsh shabýylǵa qatysy bar ekeni anyqtaldy», - dep túsindirdi Qaraǵandy oblysy PD bastyǵynyń orynbasary Ábil Ábildın.
Anyqtalǵandaı, ustalǵan er adam Qaraǵandyǵa kelip, kóshelerde jalǵyz júrgen qyz-kelinshekterdi ańdyp, sońdaryna túsken. Sodan keıin olady uryp, qashyp ketetin bolǵan. Bul rette ony jábirlenýshilerdiń qundylyqtary qyzyqtyrmaǵan. Qylmysker olardyń zattaryna tıispegen.
«QR QK 293-baby»Buzaqylyq« boıynsha qylmystyq is qozǵaldy. Tergeý júrip jatyr», - dep qosty Ábil Ábildın.
