Qaraǵandylyq «polıtseıler» Kókshetaýdyń 15 turǵynyn aldap ketti
KÓKShETAÝ. QazAqparat - Aqmola oblysynda ózderin polıtsııa qyzmetkerleri retinde tanystyryp, 15 adamdy aldaǵan Qaraǵandy turǵyndary ustaldy, dep habarlaıdy QazAqparat tilshisi.
Oblystyq Polıtsııa departamentiniń baspasóz qyzmetinen málim etkendeı, kúdiktilerdiń Kókshetaý qalasynda telefon arqyly jasalǵan birneshe qylmysqa qatysy bary anyqtaldy.
«Tergeý amaldary kezinde 2019 jylǵy 9 maýsymda Qaraǵandy oblysynyń eki turǵyny Kókshetaýǵa kelip, páter jaldaǵany málim boldy. Kezdeısoq telefon nómirlerine qońyraý shalyp, ózderin polıtsııa qyzmetkeri retinde tanystyrǵan. Keıin olardyń jaǵymsyz jaıtqa urynǵandaryn habarlap, ony sheshý úshin shuǵyl aqsha talap etken. Olarǵa sengen oblys ortalyǵynyń turǵyndary aqshany kýrer - Qaraǵandy qalasynyń buryn sotty bolǵan 36 jastaǵy turǵyny arqyly jiberip otyrǵan», - dedi vedomstvodan.
Polıtseılerdiń sózinshe, kúdiktilerdiń 15 qylmysqa qatysy bary anyqtalyp otyr. Alaıaqtardyń talap etken aqsha somasy 5 - 10 000 dollar aralyǵynda bolǵan.
«Alaıaqtardyń telefon arqyly jasalǵan sońǵy qylmysyn polıtseıler izin sýytpaı ashty. 25 maýsymda 71 jastaǵy Kókshetaý qalasynyń turǵynyna beıtanys adamdar qońyraý shalyp, onyń uly esirtkimen ustalǵanyn jáne onyń kómekke muqtaj ekenin aıtqan. Qart ájeı alaıaqtarǵa suraǵan aqshasyn esh oılanbastan berip qoıǵan. Ulyna qońyraý shalýdy keıin oılanyp, onyń esirtki qylmysyna qatysy joqtyǵyn, jumysta ekenin bilgen. Jábirlenýshiniń aryzy boıynsha polıtsııa qyzmetkerleri kúdiktiniń izine túsip, bir saǵattyń ishinde qolǵa túsirdi», - dep tolyqtyrdy vedomstvonyń baspasóz qyzmetinen.
Kúdiktiler ýaqytsha ustaý abaqtysyna qamaldy. Sondaı-aq ústerinen QR QK-niń 190-baby 2-bóligi (alaıaqtyq) boıynsha is qozǵalyp, sotqa deıingi tergeý amaldary júrgizilýde.
