Qaraǵandylyq polıtseıler erli-zaıyptylardyń 2 mln teńge salynǵan sómkesin taýyp berdi
QARAǴANDY. QazAqparat - Qaraǵandylyq polıtseıler erli-zaıyptylardyń eki mln teńge salynǵan sómkesin taýyp berdi, dep habarlaıdy QazAqparat Polisia.kz saıtyna silteme jasap.
3 maýsym kúni saǵat 12:25 shamasynda Qaraǵandy qalalyq PB-na qarasty Ortalyq polıtsııa bólimine belgisiz bireý Núrken Ábdirov dańǵylyndaǵy úılerdiń biriniń aýlasyndaǵy oryndyqtan ishinde eki mıllıon teńge aqshasy bar qol sómkeni alyp ketti degen habarlama túsken. Arada on mınýt ýaqyt ótkende oqıǵa ornyna quramynda tergeýshi Arman Imanqulov, jedel ýákil Іzmurat Múslimov jáne krımınalıst Nurlan Beısenbekov bar jedel-tergeý toby jetken. Aldymen sol jerge barǵan polıtsııa qyzmetkerleri iri kólemde aqshanyń joǵalýy boıynsha anyqtaý jumystaryn júrgizgen. Erli-zaıypty Medet jáne Veronıka Kokyshevter kólik satyp alý maqsatynda Aqmola oblysynan Qaraǵandyǵa kelgen. Núrken Ábdirov dańǵylynyń boıyndaǵy úılerdiń biriniń aýlasynda olar Qaraǵandy qalasynan satyp almaqshy bolǵan kólikti kórsetetin óziniń tanysyn kútip otyrǵan. Arada ýaqyt ótkende tanysy kelip, erli-zaıyptyny satyp alatyn kólikterin kórsetýge aparǵan. Kólik alýǵa barar jolda Veronıka otyrǵan jerlerinde ishinde eki mıllıon teńge aqshasy bar qol sómkesin umytyp ketkenin aıtyp, Núrken Ábdirov dańǵylyna qaıtyp oralady. Olar aqsha salynǵan sómkeni tappaǵandyqtan polıtsııaǵa habarlasqan.
– Oqıǵa ornyna kelgen bizder birden aýmaqqa oqıǵanyń kýágerlerin anyqtaý maqsatynda jumystar júrgizdik. Alaıda kýágerler bolmady. Іzdeý jumystary barysynda sol mańda ornalasqan oıyn-saýyq mekemesinde ornatylǵan beıne-baqylaý kamerasy baryn anyqtadyq. Mekeme dırektory bizge beınebaqylaý kamerasynyń jazbasyn qaraýǵa ruqsat berdi. Beınetaspany qaraý kezinde bizdiń nazarymyzǵa jábirlenýshiniń qaldyryp ketken qol sómkesin qoınyna tyǵyp ketip bara jatqan shamamen 30 jastaǵy adam ilindi. Biz onyń jeke basyn jáne turǵylyqty mekenjaıyn anyqtadyq. Úıine kirgenimizde ol bizge birden ishinde eki mıllıon teńge aqshasy bar qol sómkeni berdi. Biz ony ıesine qaıtaryp berdik, – deıdi Іzmurat Músilimov.
- Shynyn aıtqanda, polıtsııa qyzmetkerleri joǵalǵan aqshamyzdy taýyp beredi dep oılamadyq. Aqshanyń joǵalǵanyna ózim kinálimin. Alaıda abyroı bolǵanda polıtsııa qyzmetkerleri joǵaltyp alǵan aqshamdy bir saǵattyń ishinde taýyp berdi. Taýyp alǵan adam aqshamyzdy jumsap úlgermegen. Ortalyq polıtsııa bóliminiń qyzmetkerlerine zor alǵysymdy bildiremin, – dedi Veronıka Kokysheva.
Tańerteńgilik selektorlyq keńeste joǵalǵan aqshany izdeý jumysyna jumyldyrylǵan jedel-tergeý toby qyzmetkerleriniń jumysyn Qaraǵandy oblystyq Polıtsııa departamentiniń bastyǵy Erlan Faızýllın joǵary baǵalap, ózge qyzmetkerlerge úlgi retinde kórsetip, óz quqyǵymen marapattaıtynyn jetkizdi.
