Qaraǵandylyq polıtseıler balalarǵa arnalǵan mýltfılm qurastyrdy

QARAǴANDY. QazAqparat - Qaraǵandylyq tártip saqshylary «Polıtseı bolǵym keledi» atty mýltfılm shyǵardy. Mýltıplıkatsııalyq kartına Qaraǵandy qalasynyń mektep janyndaǵy lagerlerde kórsetildi, dep habarlaıdy QazAqparat tilshisi.

Qysqa metrajdy anımatsııalyq fılm Polıtsııa departamenti basshylyǵynyń tapsyrmasy boıynsha ázirlendi. Mýltıplıkatsııalyq kartına negizine QR ІІM ardageri Nurlan Telagısovtyń óleńderi engizildi. Sıýjet boıynsha qumda oınap otyrǵan úsh bala ótip bara jatqan patrýldik mashınany kóredi. Balalar bir-birine polıtsııada jumys isteıtin ákeleri týraly aıta bastaıdy. Sodan keıin olardyń janyna zeınetker keledi. Ol baldyrǵandarǵa naǵyz zań qyzmetshisi qandaı bolý kerektigin jáne polıtseı bolý úshin ne isteý qajettigin áńgimeleıdi.

Mýltfılmde sondaı-aq, qazaqstandyq polıtsııa qyzmetkerleriniń erligi aıtylady. Máselen, oqýshylardy alyp kele jatqan avtobýstyń júk kóligimen soqtyǵysýynyń aldyn alý úshin óz ómirin qıǵan jol polıtsııasynyń ınspektory Qaırat Jumabekov jáne janyp jatqan páterden tórt balany qutqarǵan ýchaskelik ınspektor Dáýren Altaev týraly baıandalady.

Mýltfılm Qazaqstan polıtsııasy kúni qarsańynda túsirildi.