Qaraǵandylyq polıtseı jaıaý júrginshini qaǵyp óltirgen kúdiktiden para alǵan

NUR-SULTAN. QazAqparat - Qaraǵandy oblysynda jaıaý júrginshini qaǵyp óltirý faktisi boıynsha qylmystyq isti toqtatý úshin para alǵan polıtsııa maıory áshkerelendi, dep habarlaıdy QazAqparat tilshisi.

«QR Sybaılas jemqorlyqqa qarsy is-qımyl Ulttyq bıýrosy Qaraǵandy oblysy boıynshy departamenti QR ІІM Ózindik qaýipsizdik qyzmetimen birlesip, Qaraǵandy oblysy Buqar jyraý aýdany polıtsııa basqarmasy Mustafın kentiniń polıtsııa bólimi bastyǵynyń orynbasary, polıtsııa maıorynyń paraqorlyq faktisin anyqtady», - dedi QR Sybaılas jemqorlyqqa qarsy is-qımyl Ulttyq bıýrosynyń baspasóz hatshysy Arman Berdalın elordada ótken brıfıngte.

Polıtsııa maıory jaıaý júrginshini qaǵyp óltirý faktisi boıynsha qylmystyq isti toqtatý úshin azamattan 300 myń teńge somasynda para alý boıynsha kúdikti dep tanylǵan.

«Kinásin tolyq moıyndaýyna baılanysty protsestik ustaý qoldanylǵan joq. Tergeý jalǵasyp jatyr», - dedi A. Berdalın.