Qaraǵandylyq pedagogter qaryndasyn órtten qutarqarǵan oqýshyǵa syılyq jasady
Órt ótken jyldyń jeltoqsan aıynda bolǵan. Biraq kishkentaı batyr ol týraly qazir ǵana aıta alady. Bala qoly men betinen kúıik alyp, týystarynan aıyryldy.
«Órt úıde men, qaryndasym, atam jáne ájem bolǵan kezde bastaldy. Pesh turǵan kireberiste birdeńe jarylyp ketti. Biz ol ýaqytta as úıde tamaqtanyp otyrǵan edik. Atam men ájem dálizge ne bolǵanyn kórý úshin shyǵyp ketti, olar uzaq ýaqyt oralmady. Sodan keıin men olardyń artynan baryp, peshtiń janynda bári janyp jatqanyn kórdim. Men dálizden shyǵý múmkin emes ekenin túsindim. As úıge júgirip baryp, anama qońyraý shalyp, qaryndasymdy alyp, ony terezeniń aldyna kóterdim. Sodan keıin oǵan ózim kóterilip, Rabııamen birge sekirýge daıyndaldym. Osy kezde kórshiler terezege qaraı júgirip kelip, men olarǵa qaryndasymdy berip, ózim shyqtym», – deıdi Nurıden.
Balalardyń ata-ájesi biraz ýaqyttan soń syrtqa shyqqan. Biraq denelerin 40 jáne 60 paıyz kúıik shalǵan. Olar Nurıdenmen birge aýrýhanaǵa jatqyzyldy.
«Men kelgende úı lapyldap janyp jatty. Kúıeýimniń ata-anasyn jan saqtaý bólimine, Nurıdendi qarapaıym palataǵa jatqyzdy. Ókinishke oraı, eki kúnnen keıin qaıyn atam qaıtys boldy. Taǵy eki aptadan keıin qaıyn enem qaıtys boldy. Qazir biz kúıeýimizdiń týystarynda eki bólmeli páterde turamyz. Olardyń ózderiniń bes balasy bar», – deıdi Nurıdenniń anasy Nadıra Aqyshova.
Nadıra men jubaıynyń tórt balasy bar. Nurıden men Rabııadan basqa 10 jasar uly men 13 jasar qyzy bar. Órt kezinde olar mektepte bolǵan. Qazir otbasy baspanaǵa muqtaj.
Jýyrda № 36 jalpy bilim beretin mekteptiń úshinshi synybynda oqıtyn Nurıdenge qalalyq bilim bóliminiń basshysy Esentaı Áshim qonaqqa keldi. Ol oqýshyǵa tótenshe jaǵdaıda kórsetken batyldyǵy men tabandylyǵy úshin alǵysyn bildirip, bilim bóliminiń qyzmetkerleri atynan velosıped syılady.
