Qaraǵandylyq parasportshylar Álem kýbogynda 37 medal jeńip aldy
QARAǴANDY. QazAqparat - Múmkindigi shekteýli sportshylar arasyndaǵy júzý boıynsha Álem kýbogynyń kezeńderinde qaraǵandylyqtar 37 medal, onyń ishinde jeti «altyn» utyp aldy, dep habarlaıdy QazAqparat tilshisi.
Venetsııada ótken týrnırdiń birinshi kezeńine alty qaraǵandylyq qatysty. Olardyń úsheýi - Natalıa Zvıagıntseva, Andreı Afanasev pen Álııa Rahymbekova qatarynan kýboktyń eki kezeńine qatysyp, Venetsııa men Berlınde jarysty.
Sportshylar 20 medal, onyń ishinde 2 «altyndy» Italııadan alyp keldi. Taǵy 17 medal, onyń ishinde bes «altyn» - Germanııada qol jetkizgen jetistik. Júzgishter atap ótkendeı, ekinshi kezeńde kórsetken óner sátti shyqqan.
«Biz jaqsylap boı jazdyq, Italııada sátti júzdik dep oılaımyn. Onda 50 metrlik basseın bar. Bizdiń Qaraǵandydaǵy jattyǵý basseınimiz oǵan qaraǵanda anaǵurlym kishirek. Sondyqtan jańa nysanǵa úırený kerek boldy. Árıne, bul Venetsııadaǵy nátıjelerimizge biraz áser etti. Biraq ekinshi kezeńde Berlınde biz ábden tóselip, ıkemdelip aldyq. Sondyqtan kórsetkishterimiz áldeqaıda jaqsy boldy», - deıdi sportshy Natalıa Zvıagıntseva.
Qazir júzýshiler Londonda ótetin álem chempıonatyna daıyndalýda.
Aıta keteıik, Qaraǵandy mamandandyrylǵan múgedekter sport mektebinde 144 adam júzýmen aınalysady.
