Qaraǵandylyq paraatletter BAÁ-de ótken halyqaralyq jarystarda júldeli oryndarǵa ıe boldy
QARAǴANDY. QazAqparat – Qaraǵandy oblysynyń jeńil atletteri Dastan Muqashbekov, Rýfat Habıbýllın jáne Toqtar Jaqypov Birikken Arab Ámirlikterinde ótken jarystarda Qazaqstannyń namysyn laıyqty qorǵaı aldy, dep habarlaıdy QazAqparat tilshisi.
Aldymen Shardjada halyqaralyq týrnır ótti, oǵan 22 elden múmkindigi shekteýli sportshylar qatysty. Qazaqstan atynan ıadro ıterý, naıza men dısk laqtyrý, júgirý jáne uzyndyqqa sekirý sııaqty 12 jeńil atlet qatysty.
«Bizdiń quramanyń ókilderi 15 medal jeńip aldy. Qaraǵandylyqtar ózderin óte jaqsy kórsetti. Dastan Muqashbekov dısk laqtyrýda altyn jáne ıadro laqtyrýda qola jeńip aldy. Rýfat Habıbýllın 100 metrge júgirýde ekinshi boldy, al 200 metr qashyqtyqta óner kórsetýde úshinshi oryn aldy», - dep málimdedi Qaraǵandy oblysynyń dene shynyqtyrý jáne sport basqarmasynda.
Osy týrnırden keıin qazaqstandyq qurama Dýbaıda tirek-qımyl apparaty buzylǵan jáne kórý qabileti buzylǵan sportshylar arasynda jeńil atletıkadan álemdik bas júlde serııasyna qatysty. Qaraǵandylyqtar onda da jaqsy nátıjeler kórsetti. Dastan Muqashbekov ıadro laqtyrýda altyn medalǵa ıe boldy. Al Rýfat Habıbýllın naıza laqtyrýda ekinshi oryn aldy, Toqtar Jaqypov bolsa, 400 metrge júgirýde tórtinshi oryndy enshiledi.
