Qaraǵandylyq órt sóndirýshi at ábzelderin jasaýmen aınalysady

QARAǴANDY. QazAqparat – Qaraǵandyda órt sóndirýshi-qutqarýshy jumysynan bos ýaqytynda at ábzelderin jasaýmen aınalysady. Azamattyq qorǵaý salasynyń kishi serjanty Baǵlan Myrzahanov ulttyq qundylyqtarymyzdy jas urpaq umytpasa deıdi.

Qazirgi tańda sırek kezdesetin kásipti qaraǵandylyq órt sóndirýshi-qutqarýshy Baǵlan Myrzahanov ákesinen úırengen.

Qyzmetten bos ýaqytynda ol bylǵarydan er-toqym, úzeńgi, júgen, aýyzdyq, moıyn jip, aıyl jáne taǵy basqa buıymdardy jasaıdy.

Ár nárseni ulttyq stılde órnekteýge tyrysady.

Azamattyq qorǵaý kishi serjanty №11 órt sóndirý bóliminde jumys isteıdi. Qıyn qyzmetke qaramastan, ol hobbıine ýaqyt tabady.

«Men qazaqtyń ulttyq qundylyqtaryn jas urpaq umytpaǵanyn qalaımyn. Bos ýaqytymda atqa minýge arnalǵan jabdyqtar jasaýmen aınalysamyn. Ákem bala kezinen bizdi at ábzelderiniń erekshelikterimen tanystyrdy», – deıdi sheber.

Baǵlan jylqylardy jaqsy kóredi. Ol aýylda erte jastan atqa minip ósken, sondyqtan shabandoz úshin sapaly at ábzeliniń qanshalyqty mańyzdy ekenin jaqsy biledi.

«Bir er-toqymnyń tolyq óndirisi shamamen bir aıǵa sozylady. Men ony ulttyq naqyshpen, oıý-órnekpen minsiz etip jasaýǵa tyrysamyn. Al qamshy órýge 2-3 kún qajet. Atpen júrý óte yńǵaıly bolýy kerek, bul qoldaǵy qamshyǵa da baılanysty», – deıdi qolónershi.