Qaraǵandylyq ónerpazdar Ispanııada halyqaralyq baıqaýdyń laýreaty atandy
QARAǴANDY. QazAqparat - Qaraǵandy qalasynyń №36 mektebiniń «Kerbez» horeografııalyq ansambli «Dance factory» halyqaralyq baıqaýynyń ІІ dárejeli laýreattary atandy, dep habarlaıdy QazAqparat tilshisi.
Halyqaralyq baıqaý Ispanııanyń Loret-de-Mar qalasynda naýryzdyń 23-i men 31-i aralyǵynda ótti. Óner saıysyna álemniń 18 elinen 10-12 jas aralyǵyndaǵy 1000-nan astam bıshi qatysty. «Kerbez» ansambli halyqaralyq saıysta eki horeografııalyq kompozıtsııasyn usyndy - «Sylqyldaq» qazaq bıi jáne «Horezm» ózbek bıi.
«Bizdiń basty maqsatymyz Qazaqstandy laıyqty deńgeıde tanystyrý boldy. Meniń oıymsha, ol qolymyzdan keldi. Qazaq bıi kórermenderdi sıqyrly áýendi mýzykasymen, túrli-tústi ulttyq kostıýmderimen jáne kerbezdigimen baýrap aldy», - deıdi ansambl jetekshisi Ajar Omarova.
Gala-kontsertte 120 konkýrstyq bı qoıylymdarynan eń úzdikter tańdap alyndy. Baǵdarlamany ashý qurmeti qaraǵandylyqtarǵa buıyrdy.
«Kerbez» ansambli II dárejeli laýreat atandy. Qatysýshylar baıqaýdyń quryltaıshylary men uıymdastyrýshylarynan ataýly dıplomdar aldy. Sondaı-aq ujymǵa Ispanııa bıliginiń ókilderi gravırovka túrinde qosymsha dıplom jáne eltańbaly qaǵazǵa jazylǵan alǵys hat tabys etildi.
«Balalar ıtalıandyq horeograftyń sheberlik synybyna qatysty. Jańa bilim alyp, ózderin jańa baǵytta synap kórdi. Baıqaýdan keıin 200 qatysýshy birigip Jerorta teńiziniń jaǵalaýynda bı bıledi. Bul óte ádemi ári ǵajaıypqa toly kórinis boldy. Sapar óte mazmundy boldy dep sanaımyz. Barselona qalasyna sholý ekskýrsııasynda bolyp, kóptegen ataqty tarıhı oryndardy kórdik. Olardyń arasynda Sagrada Famılııa shirkeýi, trıýmfaldy arka, Monjýık taýy, Frantsııadaǵy Karkason bekinisi men Barselona Camp Nou fýtbol klýbynyń stadıony bar», - dedi Ajar Omarova.
