Qaraǵandylyq oqýshylarǵa Qazaqstannyń táýelsizdik jyldaryndaǵy jetistikteri týraly aıtyldy

QARAǴANDY. QazAqparat - Qaraǵandy qalasynyń №104 mektep-gımnazııasynda 9-11 synyp oqýshylary úshin «Táýelsizdiktiń jetistigi» taqyrybynda respýblıkalyq synyp saǵaty uıymdastyryldy. Shara jastardy patrıottyq tárbıeleýge jáne oń dúnıetanymdy qalyptastyrýǵa baǵyttalǵan, dep habarlaıdy QazAqparat Qaraǵandy oblysy ákiminiń resmı saıtyna silteme jasap.

Іs-sharanyń qurmetti qonaqtary «Tulǵataný» ǵylymı-zertteý ortalyǵynyń dırektory Nursahan Beısenbekova, kásipker jáne metsenat Erlan Áshim, QR eńbek sińirgen qaıratkeri aqyn Dıdar Qamı boldy.

– Meni tarıhshy kózqarasymen jastarǵa Otanymyzdyń táýelsizdik jyldaryndaǵy tabystary týraly aıtyp berý úshin synyp saǵatyna shaqyrdy. Meniń oıymsha, elimizdiń jetistikteri jetip artylady. Kem degende, elde keremet mektepter salynyp jatqanyn alaıyq. 104-shi gımnazııanyń ózi buǵan dálel. Balalardyń memlekettik tilde oqýǵa múmkindigi bar. Bilim berý salasynda jahandyq ózgerister bolyp jatyr. Jyl saıyn pedagog mártebesi artyp keledi. Ǵylym men tehnologııa damyp keledi. Munyń bári bizdiń egemendigimizdiń kórsetkishi, – dep atap ótti Nursahan Beısenbekova.

Spıker mektep oqýshylaryn beıbitshilik pen birlikti baǵalaı bilýge, bilimge umtylýǵa jáne qoǵamnyń damýyna óz úlesin qosýǵa shaqyrdy. Balalar da shette qalmaı, bolashaq arman- josparlarymen bólisti.

– Men «Jyl oqýshysy – 2021» qalalyq baıqaýynyń júldegerimin. Sondaı-aq, meniń ustazdarym men mektbimniń arqasynda qol jetkizgen kóptegen marapattarym bar. Bolashaqta óz elime paıdamdy tıgizgim keledi. Sebebi qazir mende sapaly bilim alý úshin barlyq jaǵdaı bar. Qazir biz úshin barlyq esik ashyq ekenin baǵalaımyn, – dedi №104 mektep-gımnazııasynyń 9 «A» synyp oqýshysy Symbat Amankeldına.