Qaraǵandylyq oqýshylardyń kómir týraly zertteýi halyqaralyq konferentsııada úzdik tanyldy

QARAǴANDY. QazAqparat – Qaraǵandy qalasyndaǵy Nazarbaev zııatkerlik mektebiniń 8-synyp oqýshylary «Bolashaq geofızıkasy-2022» halyqaralyq ǵylymı-tájirıbelik onlaın konferentsııasynda birinshi oryn aldy, dep habarlaıdy QazAqparat tilshisi.

Inna Kım men Dalıla Qýanyshova «Taý jynystary men mıneraldaryn adamnyń sharýashylyq qyzmetinde qoldaný» baǵytynda joba usynǵan. Jetekshisi – geografııa pániniń muǵalimi Janar Baımetova. Oqýshylar «Qaraǵandy oblysynyń ónerkásip salalarynda kómirdi paıdalaný» taqyrybyn zerttegen. Aımaqta kómirdiń paıda bolýyndaǵy geologııalyq erekshelikterdi eskere otyryp, zamanaýı tehnologııa usynypty.

«Mundaı aýqymdy konferentsııaǵa alǵash ret qatystyq. Bizdiń baǵytta 14 joba usynyldy. Qazaqstannan jalǵyz top boldyq», – deıdi Inna Kım.

Olar konferentsııaǵa eki aıǵa jýyq daıyndalǵan.

«Men teorııa bóliminde, al Inna tájirıbede jumys istedi. Qýanyshymyz sheksiz. Aldaǵy ýaqytta zertteýimizdi ekologııalyq aspektide jalǵastyrýdy josparlap otyrmyz. «Kómir ónerkásibin ekologııaǵa keri ásersiz damytý» taqyrybyn ashsaq degen oıymyz bar», – deıdi Dalıla Qýanyshova.

Konferentsııa uıymdastyrýshylary – Reseıdiń Dýbna qalasyndaǵy memlekettik ýnıversıteti, Reseı jaratylystaný ǵylymdary akademııasy, Reseı geologııa qoǵamy jáne V.I. Vernandskıı atyndaǵy memlekettik geologııa murajaıy.

Jeńimpazdar dıplommen jáne estelik syılyqtarmen marapattaldy.