Qaraǵandylyq oqýshylar meıirbıke-robot pen pılotsyz avtomobıl qurastyrdy
Komandalar úsh jas sanatynda tórt baǵyt boıynsha jarysty: RoboMission, Future Innovators, RoboSports jáne Future engineers.
«Olımpıada «My robot - my friend» taqyrybyna arnalǵan jáne adamnyń kúndelikti ómirinde jasandy ıntellektti qoldanýǵa baǵyttalǵan», dep atap ótti uıymdastyrýshylar.
Nura aýdanynan kelgen «Tassýat» komandasynyń qatysýshylary Artem Bırıýkov pen Dmıtrıı Popov meıirbıke-robot jasap, Future Innovators kishi shyǵarmashylyq sanatynda jeńiske jetti.
«Ideıa ótken jyldyń qyrkúıek aıynda, pandemııa kezinde paıda boldy. Meıirbıke-robotty jasaý úshin eki jarym aı qajet boldy. Biz ony mekteptiń kireberisine qoıdyq. Robot adamnyń temperatýrasyn baılanyssyz ólshep, aıta alady, qoldy antıseptıkpen óńdeı alady», - dedi komanda jetekshisi, mektep muǵalimi Pavel Bırıýkov.
N. Nurmaqov atyndaǵy mamandandyrylǵan mektep-ınternattyń «64 bit» komandasy pılotsyz avtomobıl modelin jasap, jeńiske jetti.
«Meniń oqýshylarym Arynǵazy Baǵdaýlet pen Álıhan Seıitqalı Future Engineers sanatynda birinshi oryn aldy. Balalarǵa kedergileri bar marshrýtty eńserýi tıis pılotsyz avtomobıl modelin jınaý mindeti qoıyldy», - dep atap ótti komanda basshysy Aıdar Seıilhanov.
Qazylar alqasy barlyq tórt sanat boıynsha jeńimpazdardy iriktedi. Úzdik komandalar sertıfıkattarmen marapattaldy jáne maýsym aıynda ótetin WRO-2022 ulttyq kezeńinde Qaraǵandy oblysynyń namysyn qorǵaıtyn bolady.
