Qaraǵandylyq oqýshylar gıdroponıka ádisimen ósimdik ósirýdi úırenedi

QARAǴANDY. QazAqparat - Qaraǵandy oblysynyń oqýshylary arnaıy qurylǵyda ósimdikterdi qalaı ósirýge bolatynyn úırenedi. Óńirimizde «Jasyl ósimdikterdi gıdroponıka jáne aeroponıka ádisimen ósirý» jobasy bastaldy, dep habarlaıdy QazAqparat tilshisi.

«Murager» mamandandyrylǵan mektep-ınternatynda bıologııa jáne ınformatıka pánderiniń muǵalimderi úshin oqytý semınary ótti. Shara bilimdi damytý oqý-ádistemelik ortalyǵynyń qoldaýymen uıymdastyrylǵan. Ustazdarǵa joba týraly, maqsattar men oqý ádistemeleri týraly aıtyldy. «ZERTIS» kompanııasynyń birlesken quryltaıshylary men «Gıdroponıka oqýshylar úshin» kabınetin qurýshylar jobanyń júzege asyrylý algorıtmin túsindirip berdi.

«Gıdroponıka kabıneti bizde qyrkúıekte ashyldy, - deıdi «Murager» MMI dırektory Nurǵazy Ótebaev. - Bizdiń oqýshylar osy tehnologııa men qurylǵylardy qoldana otyryp, qulpynaı, bıdaı, raıhan, jalbyz, burshaqtar ósiredi. Buǵan qosa, olar kásipkerlik negizderin úırenedi. Mysaly, raıhan shóbiniń bir kelisi 8000 teńge turady, ony ósire alsa, satyp bolǵan soń ári qaraı jumys júrgizýge tuqymdar satyp ala alady».

Gıdroponıka kabıneti ósirýshi jabdyqtary jáne sýda ósimdik ósirýge arnalǵan qurylǵylary bar arnaıy partalarmen jabdyqtalǵan.

Bıologııa pániniń muǵalimi Madııar Ábdildarovtyń aıtýynsha, gıdroponıkada eń bastysy - sýmen qamtý.

«Gıdroponıka» ataýy grek tilindegi «gıdro» - sý jáne «pònos» - jumys sózderinen shyqqan. Barlyq «jumysty» sý atqarady. Sondyqtan munda ósimdikterdi ósirýge qandaı sýdy qoldanatynymyz mańyzdy», - deıdi ol.

11-synyp oqýshysy Nazym Ázilhan bolashaqta óz jylyjaıyn salýdy armandaıdy.

«Men gıdroponıkamen shuǵyldanamyn. Maǵan ósimdikter týraly ǵylym burynnan unaıdy. Munda men bıdaı ósirip shyǵardym. Gıdroponıkanyń artyqshylyǵy - protsesti tolyqtaı ózimiz qadaǵalaıtynymyzda. Eger ósimdik dalada ósse, topyraqtaǵy qunarly zattardyń kontsentratsııasy qandaı ekenin naqty bilemiz. Onda qunarly zattardyń mólsheri tym kóp nemese az bolsa, ósimdikter solyp qalady. Al munda biz barlyǵyn ózimiz qadaǵalap otyramyz. Ósimdik jaqsy ósýi úshin sýǵa qansha qunarly zattar salý kerektigin esepteımiz. Osynda alǵan bilimim maǵan bolashaqta kómektesedi dep senemin. Men ózimniń jeke jylyjaıym bolsa dep armandaımyn. Ol jerde gıdroponıka ádisin qoldanamyn», - deıdi Nazym Ázilhan.

Gıdroponıka kabınetterinde ósirý protsesterin qadaǵalaıtyn «datchıkter» bar. Olardy kompıýterge nemese smartfonǵa qosyp, protsesti qashyqtyqtan qadaǵalaýǵa bolady.

«Bizdiń kez kelgen jobamyz aımaǵymyzdyń qandaı da bir áleýmettik problemalaryn sheshýge baǵyttalǵan, - dep atap ótti dırektordyń ǵylymı-ádistemelik jumystar boıynsha orynbasary Larısa Antoşýk. - Mysaly, osy rette biz qalany kógaldandyrý boıynsha jobalardy usyna alamyz. Osylaısha, balalar atalmysh pán boıynsha bilimderin tereńdetip qana qoımaı, óz sheshimderin de usyna alady. Bul bolashaqta damýy múmkin bıznes ıdeıalar bolyp tabylady».

Búgingi tańda Qaraǵandy oblysynyń mektepterinde osy sekildi 8 gıdroponıka kabıneti jabdyqtalǵan. Qosymsha taǵy 10 kabınetke jabdyqtar satyp alý josparlanyp otyr.