Qaraǵandylyq oqýshylar «aqyldy» baǵdarsham men robogıd qurastyrdy
Qazylar alqasy eki jas sanaty boıynsha: 10-15 jáne 16-21 jas aralyǵyndaǵy jeńimpazdar men júldegerlerdi tańdady. Kishi topta Qaraǵandy qalalyq № 9 gımnazııasynyń oqýshylary Danıl Mışenko jáne Alan Qurmanovtyń (jetekshisi - Elena Ilına) energııa únemdeıtin «aqyldy» baǵdarsham jobasy úzdik dep tanyldy.
Joǵary topta Temirtaý qalalyq № 1 gımnazııasynyń oqýshylary Anton Fedorov pen Irına Kım (jetekshisi - Evgenııa Kadyseva) «Qala boıynsha Robogıd» jobasymen jeńiske jetti. Temirtaýlyq joǵary synyp oqýshylary qurastyrǵan robogıd tramvaıda qatynap, qalanyń kórnekti oryndarymen tanystyrady.
Joba avtorlarynyń aıtýynsha, olar kóliktiń osy túrin kezdeısoq tańdamaǵan. Sebebi tramvaı jelileri elimizdiń birneshe qalalarynda ǵana, onyń ishinde Temirtaý qalasynda qalǵan. Oqýshylar tramvaı qurastyryp, qala kartasyna uqsastyrylǵan tósem boıynsha qozǵalys baǵdaryn ázirlegen. Jobany jasaýda 3D-modelder qoldanylǵan.
Jeńimpaz komandalar bıylǵy maýsym aıynda Nur-Sultan qalasynda ótetin baıqaýdyń aqtyq saıysynda oblys namysyn qorǵaıtyn bolady.
Aıta keteıik, jarys Qaraǵandy Memlekettik tehnıkalyq ýnıversıtetinde ótti. Saıysty «Kazrobotıks» respýblıkalyq bilim berý jáne sporttyq robototehnıka federatsııasynyń oblystyq fılıaly jáne «RoboClub» JShS birlese uıymdastyrdy. Sonymen qatar sharanyń seriktesteri retinde QR Tuńǵysh Prezıdenti - Elbasy qory, Qaraǵandy oblysynyń Bilim basqarmasy, «Bolashaq» Qaraǵandy joǵary kolledji jáne birqatar kompanııalar shyqty.
