Qaraǵandylyq oqýshylar AQSh-ta ótetin baıqaýǵa ınnovatsııalyq joba usynbaq

ASTANA. QazAqparat - Massachusetts FIRST LEGO League halyqaralyq chempıonaty maýsym aıynyń ortasynda Amerıkanyń joǵary oqý orny Worcester Polytechnic Insitute bazasynda ótedi, dep habarlaıdy QazAqparat QR Oqý-aǵartý mınıstrliginiń baspasóz qyzmetine silteme jasap.

Oǵan Qaraǵandy mamandandyrylǵan «Murager» mektep-ınternatynyń «JelToqSun» komandasy óz jobalaryn usynbaqshy. Olar robototehnıka jáne baǵdarlamalaý daǵdylary ǵana emes ınnovatsııalyq jobalar baıqaýynda da baq synaıdy. Top músheleri energııa taqyrybynyń ózekti máseleleriniń ınjenerlik sheshimin tapty. Olardyń jel elektr stantsııasy qoldanysqa ense óndiris, sharýashylyq úshin tıimdi bolmaq.

«Bizdiń ınnovatsııalyq generatorymyz qazaqtyń kıiz úıi ispetti. Konýs pishininiń arqasynda jeldi jan-jaqtan ustaıdy. Aýyldyq jerde, ásirese eldiń soltústiginde qatty jel tursa eski magıstraldyq jeliler isten shyǵyp qalady. Al bizdiń joba sol tabıǵı qubylysty paıdaly mehanızmge paıdalaný. Bul jobany burynnan bar kóp júzdi rotordyń negizinde jasadyq. Bizde «jel dıirmeniniń» birneshe nusqasy boldy, tórtburyshty, dóńgelek olardyń barlyǵyn tájirıbeden ótkizdik. Onyń tıimdiligin jeldiń jyldamdyǵyna baılanysty qozǵalysyna qaraı eseptedik», - deıdi komanda ınjeneri Sanjar Sársembaev.

Aıta keteıik, oqýshylar óz jobalaryn jergilikti metallýrgııa kásipornynyń ınjenerlerine tanystyrdy, oǵan memlekettik ýnıversıtetterdiń ǵalym, doktorlary oń baǵa berdi.

Endi Massachusetts FIRST Lego League halyqaralyq chempıonatynda qorǵaıtyn bolady. Oqýshylar AQSh-qa joldamany Astana qalasynda QR Oqý-aǵartý mınıstrliginiń qoldaýymen ótken Central Asia FIRST LEGO League Championship robototehnıka saıysynda jeńip alǵan bolatyn.