Qaraǵandylyq oqýshy «Jýsan ıisi» shyǵarmasy negizinde ústel oıynyn qurastyrdy

QARAǴANDY. QazAqparat – Qaraǵandy qalasy hımııa-bıologııa baǵytyndaǵy Nazarbaev zııatkerlik mektebiniń 7-synyp oqýshysy Aqnuraı Amangeldi Saıyn Muratbekovtiń «Jýsan ıisi» povesi negizinde «Bilim batl» ústel oıynyn qurastyrdy. Atalmysh shyǵarma jalpy orta jáne Nazarbaev zııatkerlik mektepteriniń oqý baǵdarlamasyna engizilgen, dep habarlaıdy QazAqparat tilshisi.

Aqnuraıǵa ústel oıynyn qurastyrý ıdeıasy 6-synypta oqyp júrgende kelgen.

Synyptastarynyń kórkem shyǵarma oqýǵa qyzyǵýshylyǵynyń joqtyǵy, shyǵarma mazmuny men ondaǵy keıipkerlerdi este saqtaý qıyndyǵy, kórkemdegish quraldardy ajyrata almaý sekildi máselelerdi kórgen kezde bul máseleni sheshýdiń jolyn oılastyrǵan.

Kórkem shyǵarmalar negizinde qurylǵan ústel oıyndaryn zertteý barysynda oqýshy shetel ádebıetine súıene otyryp jasalǵan ústel oıyndarynyń kóp ekendigin, al qazaq ádebı shyǵarmalary negizinde qurylǵan oıyndardyń joqtyń qasy ekenin anyqtaǵan.

Oqýshynyń ıdeıasyna qazaq tili men ádebıeti pániniń muǵalimi, jobanyń jetekshisi Súleımenova Meıramgúl Meırashqyzy men óner pániniń muǵalimi Jamelov Qaıyrjan Jeńisuly birlese qoldaý kórsetip, 6 aıda ústel oıynyn qurastyryp shyǵarǵan.

Oıynda «Keıipkerdi tany», «Sýret-sıýjet», «Oı zerek», «Sóz kórkem» degen árqaısysy 20 kartadan turatyn jalpy sany 80 karta bar.

Oıyn kilemshesindegi oıynshylardyń júrý baǵyttary ulttyq oıý-órnek túrinde berilse, oıyn elementteri qobyz, torsyq, dombyra, jylqy sekildi ulttyq qundylyqtarǵa negizdelip jasalǵan.

Aqnuraı ústel oıynyna avtorlyq quqyq alǵanyn aıtady.

«Qazaq ádebı shyǵarmalardy oıyn arqyly meńgertýdiń nátıjesi joǵary, óıtkeni sabaqta jáne úzilis kezinde oınaǵan saıyn synyptastarym shyǵarmany óte jaqsy meńgerip aldy»,- deıdi Aqnuraı.

Aqnuraı aldaǵy ýaqytta oıyn erejesine azdaǵan ózgeris engizý arqyly ústel oıynyn telefon arqyly oınaýǵa yńǵaıly bolatyn qosymshaǵa aınaldyrýdy kózdep otyr.