Qaraǵandylyq oqýshy Mendeleev olımpıadasynda qola júlde ıelendi
QARAǴANDY. QazAqparat - Reseıdiń Sankt-Peterbýrg memlekettik ýnıversıtetinde hımııa páninen 53-shi halyqaralyq Mendeleev olımpıadasy ótti. Atalmysh zııatkerlik jarysta qaraǵandylyq Oljas Nurpeıisov úshinshi orynǵa ıe boldy, dep habarlaıdy QazAqparat tilshisi.
Oljas Nurpeıisov №1 Qaraǵandy «Bilim ınnovatsııa» lıtseıiniń 11-synybynda oqıdy. Ol Mendeleev olımpıadasyna ekinshi ret qatysýda. Ótken jyly ol osy bilim dodasynda ekinshi orynǵa ıe bolǵan. Sondaı-aq, Chehııa men Slovakııada ótken olımpıadaǵa qatysyp, úshinshi orynǵa ıe boldy.
Bıyl Mendeleev olımpıadasynda 28 elden 152 oqýshy qatysty.
№ 1 «Bilim ınnovatsııa» lıtseıiniń málimetinshe, baıqaýdyń birinshi kezeńniń mindetteri arnaıy hımııalyq synyptar baǵdarlamasyna sáıkes bolǵan. Ekinshi týrda oqýshylar beıorganıkalyq, organıkalyq, analıtıkalyq, fızıkalyq hımııa boıynsha joǵary deńgeıdegi tapsyrmalardy sheshken. Úshinshi týr - eksperımenttik boldy.
Jalpy esepte Qazaqstan ulttyq quramasy eki kúmis jáne alty qola medal jeńip aldy.
Eske sala ketsek, Halyqaralyq Mendeleev olımpıadasy 1997 jyly Búkilodaqtyq hımııa páni olımpıadasynyń murageri boldy. 2004 jyldan bastap oǵan TMD jáne Baltyq elderiniń oqýshylarynan basqa álemniń basqa da elderiniń komandalary qatysa bastady.
Aıta keterligi, Oljas Koreıa ýnıversıtetteriniń birinde grantqa ıe bolyp, oqýǵa tústi. Sondaı-aq, ol hımııa páninen «Tuymaada» halyqaralyq saıysynyń (ekinshi oryn), Bekturov atyndaǵy hımııa páninen halyqaralyq olımpıadanyń júldegeri (birinshi oryn) jáne Q. Sátbaev atyndaǵy halyqaralyq hımııa olımpıadasynyń (birinshi oryn) jeńimpazy.
