Qaraǵandylyq neırohırýrgter omyrtqaǵa ınnovatsııalyq ota jasaýǵa úırenedi
QARAǴANDY. QazAqparat - H.J.Maqajanov atyndaǵy klınıkanyń neırohırýrgteri omyrtqaǵa ınnovatsııalyq az tilinetin ota jasaýǵa úırenedi. Atalmysh otany tájirıe júzinde úıretý maqsatynda Qaraǵandyǵa Reseıdiń Novosibir qalasynyń ıA. L. Tsıvıan atyndaǵy travmatologııa jáne ortopedııa ǵylymı-zertteý ınstıtýtynyń mamany Aleksandr Krýtko keldi, dep habarlaıdy Qaraǵandy oblysy ákimdiginiń baspasóz qyzmeti.
Qaraǵandylyq dárigerlerge tanystyrylǵan hırýrgııalyq emdeý ádisi omyrtqanyń barynsha turaqtanýy úshin onyń barlyq ıilimderi men bólimderiniń tepe-teńdigin eskere otyryp, omyrtqa bólikterin aýystyrýǵa negizdelgen. Bul tásil kúrdeli daıyndyqty talap etedi. Dárigerler emdelýshiniń omyrtqasynyń jaǵdaıyn baǵalap, sagıttaldyq tepe-teńdik saqtalýy úshin arnaıy formýlalardyń kómegimen esepteýler júrgizedi. Mundaı hırýrgııalyq sharalardan soń qosymsha otalar jasaý kerek emes. Óıtkeni omyrtqa birden fızıologııalyq normasyna kelip, aýyrtpalyqtar basylyp, patsıentter óz betimen júre alady. Hırýrgııalyq emdeýden soń jaǵdaıdyń kúrdelený táýekeli de tómen .
«Áriptesterimiz bizdi Qaraǵandydaǵy bazalaryna shaqyrdy. Bizdiń tájirıbemiz olarǵa da, em alýǵa kelgen patsıentterge de paıdaly bolady degen úmittemiz. Biz ótkizgen sheberlik sabaǵy aldymen ota jasaıtyn patsıentti tańdaýdy qarastyrady. Bes naýqastyń ishinen biz kimge tez ári nátıjeli kómek kórsýge bolatyn bireýin tańdaımyz. Al úlken otalardy biz ázirge kidrte turamyz. Sheberlik sabaǵy dárigerler úshin jáne emdelýshiler úshin de paıdaly bolady. Tehnologııaǵa keler bolsaq, biz ony kún saıyn qoldanamyz, bul sońǵy 10 jyldaǵy qol jetkizilgen álemdik tehnologııa. Onyń ereksheligi - esep jasap, matematıkalyq model boıynsha barlyq otany josparlaýǵa bolatyndyǵynda, - deıdi Aleksandr Krýtko.
Sheberlik-synyby eki bólimnen quralady - teorııalyq jáne tájirıbelik. Búgin qaraǵandylyq dárigerler Aleksandr Krýtkonyń jetekshiligimen rentgen keskinderin taldap, áleýetti emdelýshilerdiń anamnezderi men dıagnozyn talqylaýda, artynan ota da jasalady.
