Qaraǵandylyq memlekettik qyzmetshiler óz bonýstaryn qalaı jumsamaq
Elimizdiń Tuńǵysh Prezıdenti - Elbasy tıimdi memlekettik apparat qalyptastyrý mindetin qoıǵan bolatyn. Kez kelgen reformanyń jetistigi onyń qyzmetshileriniń kásibıligine tikeleı baılanysty. Osy turǵyda olarǵa qoıylatyn negizgi talap - qoǵam ıgiligi úshin eleýli nátıjelerge qol jetkizý. Bul - memlekettik apparattyń jumysyna baǵa berip otyrǵan basty shart.
Osy prıntsıp Qazaqstan Respýblıkasy Memlekettik qyzmet isteri jáne sybaılas jemqorlyqqa qarsy is-qımyl agenttiginiń Qaraǵandy oblysy boıynsha departamentinde synaqtan ótkiziletin syıaqy júıesinde negizge alynǵan. Onyń basty ereksheligi - qyzmetshiniń jalaqy mólsherine onyń sońǵy nátıjege qol jetkizýge qosqan úlesi áser etedi.
«Biz merekelerde beriletin syılyqtan bas tarttyq jáne yntalandyrý retinde tek tıimdi qyzmetkerler úshin bonýstardy qoldanamyz», - dep habarlady MQІSQA tóraǵasynyń orynbasary Aıgúl Shaıymova.
Kópshilik sanasynda qalyptasqan stereotıpter boıynsha syıaqy men bonýs birdeı sekildi kórinedi. Degenmen, bular - múldem ártúrli yntalandyrý quraldary. Birinshiden, bonýs jumysta nátıjege qol jetkizgen jaǵdaıda jylyna bir ret tólenedi. Ol qyzmetshilerdiń jeke josparyn baǵalaý negizinde anyqtalady.
«Jalpy, eńbekaqy tóleýdiń jańa júıesin engizý eń aldymen memlekettik qyzmet ımıdjin kóterýge múmkindik berdi. Eńbek ádil baǵalanady jáne tólenedi, árbir memlekettik qyzmetkerdiń jaýapkershiligin arttyrady jáne departamenttiń árbir qyzmetkeri alǵa qoıylǵan maqsattar men nátıjelerge qol jetkizýge múddeli bolady», - dep habarlady departament basshysynyń orynbasary Talant Medet.
Bonýs alý úshin qyzmetkerlerge jeke josparda belgilengen bes shartty oryndaý qajet. Eger memlekettik qyzmetshi osy beseýden úsh shartty oryndamasa, ol bonýs alý múmkindiginen avtomatty túrde aıyrylady. Sondaı-aq, bonýstyń mólsherine oryndaýshylyq jáne eńbek tártibin saqtaý da áser etedi.
Eger qyzmetshi qujattardy oryndaý merzimin buzsa nemese júıeli túrde keshikse, ol jaýapkershilikke tartylady, onda onyń bonýstary jartylaı azaıady. Biraq tıimsiz qyzmetshiler bonýstardan múldem aırylady. Mundaı baǵany ekinshi márte alǵan qyzmetker jumystan bosatylýy da múmkin.
Jańa júıeniń ekinshi aıyrmashylyǵy - teńsizdiktiń aldyn alýyna qatysty. Búginde syıaqy tóleý memlekettik organda únemdelgen qarajattyń bolý-bolmaýyna tikeleı baılanysty. Bul yntalandyrý máselelerinde belgili bir teńgerimsizdikke ákeledi. Ásirese, ol aýdandyq jáne aýyldyq deńgeıde jıi baıqalady. Jańa júıede buǵan jol berilmeıdi, sebebi bonýs ár qyzmetshige josparlanady.
«Árıne, eńbekaqy tóleýdiń jańa júıesi áriptesterimniń jáne meniń ómirime oń áser etti. Biz jańa tólem júıesinde qarastyrylǵan bonýstar alýǵa barynsha tyrysamyz. Men osy jyly otbasymdy qurýdy josparlap otyrmyn, ol úshin meniń tapqan bonýstarym úlken kómek bolyp otyr. Áriptesterimmen sóıleskende, olardyń bireýi turǵyn úı alý úshin depozıtin tolyqtyryp, bireý tutynýshylyq nesıe boıynsha qaryzdy merziminen buryn óteýge múmkindik alǵanyn estımin»,-deıdi departamenttiń sybaılas jemqorlyqtyń aldyn alý basqarmasynyń bas mamany Oljas Burhanov.
Jalpy, faktorlyq-balldyq meje jıyntyǵynda bonýstar birinshiden, azamattardyń ál-aýqatyn arttyrýǵa baǵyttalǵan qyzmettik mindetterdi tıimdi jáne adal atqarýǵa yntalandyrady. Oǵan joǵaryda keltirilgen mysaldar dálel. Ekinshiden, memlekettik qyzmettiń sapaly quramyn arttyrý úshin jaǵdaı jasaıdy.
Esterińizge sala keteıik, bul - pılottyq joba. Ony odan ári aýqymdy túrde qoldaný pılottyq qorytyndylar boıynsha júzege asyrylady. Memlekettik organdardyń shyǵystaryn ońtaılandyrý bıýdjetke qosymsha júktemesiz kóshý jolymen qamtamasyz etiledi.
