Qaraǵandylyq mádenıet qyzmetkerleri kásibı merekesine oraı páter aldy
QARAǴANDY. QazAqparat – Qaraǵandy oblysynyń ákimi Jeńis Qasymbektiń bastamasymen uzaq ýaqyt ishinde alǵash ret 30 mádenıet jáne óner qyzmetkeri jeke baspanaǵa ıe boldy. Páterler Saran men Aqtas kentinde ornalasqan, dep habarlaıdy QazAqparat tilshisi.
Kilt tapsyrý rásimi Qaraǵandy oblysy ákiminiń jyl saıynǵy syılyǵynmen saltanatty marapattaý barysynda ótti.
«Bes jyl boıy jubaıymmen birge baspana jaldadyq, sodan keıin ata-anamyzben birge turdyq. Kúıeýim menimen birge teatrda jumys isteıdi. Qazir úsh balamyz bar, tórtinshisin kútip júrmiz. Jeke páter alǵanymyz biz úshin tosynsyı boldy. Osyndaı syılyq úshin rahmet aıtamyz. Áriptesterimniń de joly bolyp, baspanaly bolatynyna senemin», – deıdi Dınara Aıǵazınova.
Natalıa Sıdorova eki balasymen jáne jubaıymen birge jaqyn arada jalǵa beriletin úıge kóship kiredi. Ol jańa baspanada qalypty ómir súrý úshin bári bar deıdi.
«Kosmetıkalyq jóndeý jasaldy, plıta, tıtan bar. Bul - biz úshin óte qýanyshty sát. Emotsııa tasyp barady. Mádenıet salasy qyzmetkerlerine kópten beri páter berilmegenin atap ótkim keledi. Bizge degen yqylas-qurmet úshin kóp rahmet», – dep Qaraǵandy mýzykalyq komedııa teatrynyń aktrısasy alǵysyn jetkizdi.
Óńir basshysynyń aıtýynsha, aldaǵy jyldary mádenıet qyzmetkerleri úshin taǵy 150-200 páter bólý josparlanǵan.
Sondaı-aq, Mmádenıet jáne óner qyzmetkerleri kúni qarsańynda Qaraǵandy oblysy ákiminiń syılyǵymen marapattaý rásimi ótti.
Bul marapat jyl saıyn kásibı sheberligi, sheberligin jetildirgeni jáne mádenı salany damytýǵa qosqan úlesi úshin beriledi.
«Eń qıyn kezeńde de óner bizdi árdaıym qutqaryp, qoldap otyrdy. Sahnalar men zaldardyń jabylýyna qaramastan, mádenı is-sharalar vırtýaldy formatqa kóshti jáne sonymen birge shynaıylyq pen kórkemdigin joǵaltpady. Óz isine adaldyǵy úshin sizderge taǵzym etemiz», – dedi óńir basshysy óziniń quttyqtaý sózinde.
Bıyl komıssııa 21 nomınatsııa boıynsha 24 laýreatty tańdady. Jeńimpazdarǵa dıplomdar, aqshalaı syılyqtar jáne baıqaýdyń nyshany – «Qobyz» músini tabys etildi.
S. Seıfýllın atyndaǵy Qazaq drama teatrynyń aktrısasy Nurjibek Jansúgirova men K. Stanıslavskıı atyndaǵy teatr akteri Ivan Nemtsev «Mamandyǵyna adaldyǵy úshin» nomınatsııasynda baıqaýdyń basty marapattarynyń birin ıelendi.
«Barshańyzdy mádenıet jáne óner qyzmetkerleri kúnimen quttyqtaımyn. Qıyn jaǵdaıǵa qaramastan, biz aman qaldyq. Murajaılar, teatrlar, kitaphanalar óz jumystaryn jalǵastyrdy, kórermenderi men oqyrmandaryn qýantty. Qanshalyqty qıyn bolsa da, ulttyq mádenıettiń órkendeýin tileımin. Óner qaıratkerlerine erekshe kóńil bólgeni úshin oblys basshylyǵyna alǵysymdy bildiremin», – dedi Nurjibek Jansúgirova.
