Qaraǵandylyq qyz polıtseılerge alǵys aıtty
QARAǴANDY. QazAqparat - Qaraǵandy oblystyq polıtsııa departamenti bastyǵynyń atyna qala turǵynynan ortalyq polıtsııa bóliminiń eki qyzmetkerin: aǵa leıtenanttar - Rústem Táttimbetov pen Mansýr Daıyrovqa qylmysty jyldam ashqany úshin alǵys aıtyp, yntalandyrýdy suraǵan ótinish kelip tústi, dep habarlaıdy QazAqparat tilshisi.
Bıyl 9 aqpan kúni 22 jastaǵy boıjetken Ermekov kóshesimen úıine kele jatady. Kenet belgisiz er adam aldynan shyǵyp, týystaryna qońyraý shalyp alaıyn dep telefonyn suraıdy. Telefonyn bergen boıda er adam zyta jónelgen. Qyz ony qýyp jetpek bolady, biraq anaý jetkizbeı ketedi.
Jábirlenýshi tonaý faktisi týraly ortalyq polıtsııa bólimine aryz túsiredi. Qylmystyq polıtsııanyń jedel ýákilderi Rústem Táttimbetov pen Mansýr Daıyrov qyzdan urynyń syrt kelbetin sıpattap berýin surap, sol arqyly kúdiktiniń fotorobotyn jasaıdy. Jedel sharalar nátıjesinde polıtseıler buryn sottalǵan 50 jastaǵy er adamdy ustady. Bul kezde kúdikti qyzdan tartyp alǵan telefondy satyp úlgergen eken.
Áli telefonyn qaıtara almasa da, qaraǵandylyq qyz polıtseılerdiń jyldamdyǵyna rıza bolyp, alǵysyn bildirdi.
Qazir zattaı aıǵaqty tárkileý boıynsha tergeý amaldary júrip jatyr. Osy is boıynsha QR Qylmystyq kodeksiniń 191-babyna («Tonaý») sáıkes sotqa deıingi tergep-tekserý júrgizilýde.
