Qaraǵandylyq qyz Gonkong ýnıversıtetiniń úzdik stýdentteriniń qataryna kirdi
Qazir ol ýnıversıtettiń qurylys ortasy jáne energetıka departamentiniń tórtinshi kýrsynda oqıdy, dep habarlaıdy QazAqparat.
Gúljan 2018 jyly Qaraǵandynyń Nazarbaev Zııatkerlik mektebin bitirdi. Jaqynda ol oqýdaǵy erekshe jetistikteri men ýnıversıtettiń qoǵamdyq ómirine belsendi qatysqany úshin Úzdik stýdent ataǵyna ıe boldy. Qyz bala óz áserleri jáne josparlary týraly aıtty.
«Tórtinshi kýrstyń basynda men energııa salasyndaǵy zertteýlermen aınalysqym keletinin túsindim, sondyqtan bakalavrıatty bitirgennen keıin oqýdy PhD in Mechanical Engineering baǵdarlamasy boıynsha jalǵastyramyn. Árıne, Úzdik stýdent ataǵy men úshin úlken jaýapkershilik. Men qazaqstandyq oqýshylarǵa birneshe keńes bergim keledi. Birinshiden, oqýǵa jáne bilim alýǵa bar kúshińdi salý kerek. Ekinshiden, ózińdi basqalarmen salystyrýdyń qajeti joq jáne bir nárse bolmaı jatsa, renjip, enseńdi túsirmeý kereksiń. Jumysty jalǵastyryp, óz kúshińe sený kerek. Úshinshiden, múmkindik joq jerde ózińizdi synap kórseńiz jaqsy bolar edi. Eger qolyńyzdan kelse, siz ózińiz qalaǵan nátıjege qol jetkizesiz, al bolmaı jatsa – sizge joq degen jaýap keler. Ol jasalmaǵan nársege ókinýden áldeqaıda jaqsy», – dedi Gúljan.
Muǵalimder Gúljan kez-kelgen ortanyń kóńilin kóteretin jarqyn tulǵa jáne optımıst dep ataıdy. Mektep qabyrǵasynda da ol qurdastarynan kúrdeli máselelerdi sheshýdiń standartty emes tásilderin usynýmen erekshelendi.
«Gúljan – erekshe bala. Meni árqashan onyń oılaý logıkasy tań qaldyrady. Ol árdaıym oqýǵa jaýapkershilikpen qarady. Qoryqpaı, qıyn mindetterdi qolǵa aldy, keıde tipti qosymsha sharttar oılap taýyp, olardy qıyndatyp jiberetin. Ol jan-jaqty damyǵan. Árqashan óz bilimin qaıda jáne qandaı salalarda qoldana alatynyn túsinýge tyrysty. Osyny baıqaǵan soń men oǵan 2018 jyly Y. Altynsarın atyndaǵy Ǵylymı bilim akademııasynyń «Bilim – Obrazovanıe» jýrnalyna birlesken maqala jazýdy usyndym. Onda ol matematıkanyń qoldanbaly sıpatyn ártúrli bólimderde asha bildi», – deıdi Qaraǵandynyń NIS matematıka pániniń muǵalimi Svetlana Peters.
Osyǵan deıin Qaraǵandy oblysynyń bilim berý uıymdarynda koronavırýske qatysty shekteýler alynǵanyn jazǵan bolatynbyz.