Qaraǵandylyq qutqarýshylar men volonterler muqtaj azamattardyń úı mańyn qardan tazartýda

QARAǴANDY. QazAqparat – Sý tasqyny kezeńine daıyndyq aıasynda Qaraǵandy oblysynyń aýmaǵynda jan-jaqty praktıkalyq is-sharalar júrgizilýde. Sonyń ishinde, Qaraǵandy oblysynyń Tótenshe jaǵdaılar departamenti volonterlermen birge halyqtyń áleýmettik osal toptarynyń úı janyndaǵy ýchaskelerin qardan tazartýda, dep habarlaıdy QazAqparat tilshisi.

Qaraǵandy qalasynda «30 ıgi is» aktsııasy aıasynda TJ departamentiniń bólimsheleri men volonterler jalǵyzbasty zeınetkerler men múgedekter turatyn 20-dan astam úı ýchaskelerin qardan tazartty.

«Qazirgi ýaqytta oblys aýmaǵynda sý tasqyny jaǵdaıy turaqty, barlyq sý aıdyndary ázirge qysqy rejımde, ózenderde muzdyń júrýi baıqalmady. Ǵaryshtyq monıtorıng derekteri boıynsha búgingi kúni oblys aýmaǵynyń 85% qarmen jabylǵan. Qazgıdromettiń málimetinshe, oblysta topyraqtyń qatý tereńdigi 61-den 150 santımetrge deıin. Samarqand jáne Yntymaq sý qoımalarynan sanıtarlyq sý bosatý jalǵasýda», - dep málimdedi Qaraǵandy oblystyq TJ departamentinen.

Qardy tazalaý jáne shyǵarý jumystary oblystyń barlyq eldi mekeninde júrgizilýde. Búgingi kúnge deıin 1232 myń tekshe metr qar shyǵaryldy.

Barlyq mańyzy bar avtojoldarda sý ótkizý qurylystaryn tazalaý boıynsha jumystar qarqyndy atqarylýda. Shamamen 1900 sý ótkizý qubyry tazartyldy.

Ótken jyly Qaraǵandy oblysynyń 33 eldi mekeni aýmaǵynda 22 km astam qorǵaý bógetteri men dýaldar salyndy jáne nyǵaıtyldy; ózen arnalarynyń sý tasqyny qaýpi bar ýchaskelerin 12 km qorǵaý jumystary júrgizildi; 65,5 km drenaj jáne sý ótkizý qubyrlary tazartyldy; joldardyń 74 ýchaskesinde sý ótkizý qabileti joǵarylatyldy.

«Sý tasqyny kezeńine barlyǵy 6700 adam jáne 1600 birlik tehnıka daıyndyqqa keltirildi. Basqarý organdary úshin sý tasqyny kezeńine arnaıy is-qımyl algorıtmi jasaldy. Kóp jyldyq baqylaýlar negizinde sý basýy múmkin jáne sý tasqyny bolýy múmkin aımaqta ornalasqan 174 eldi meken anyqtaldy. Olardyń barlyǵy erekshe baqylaýǵa alyndy», - dep tolyqtyrdy vedomstvodan.

Sondaı-aq, avtomobıl jáne temirjoldardyń sý tasqyny qaýpi bar 139 ýchaskesi baqylaýǵa alyndy. Turǵyndar úshin tótenshe jaǵdaılar qaýpi jáne týyndaýy kezindegi is-qımyldar boıynsha arnaıy usynymdar ázirlendi, olar reıdtik is-sharalar barysynda taratylýda. Halyqpen túsindirý jáne úgit-nasıhat jumystary turaqty túrde júrgizilip jatyr. Jaǵdaı turaqty baqylaýda.