Qaraǵandylyq qutqarýshy alty jetim balany baýyryna basqan
QARAǴANDY. KazAqparat – Qaraǵandylyq qutqarýshy Nıkolaı Sobolevskıı kópbalaly áke. Jubaıy Tatıanamen birge olar túrli ult jáne túrli jastaǵy 9 balany tárbıelep otyr. Olardyń úsheýi – erli-zaıyptylardyń óz balalary, al qalǵan altaýyn balalar úıinen asyrap alǵan, dep habarlaıdy QazAqparat tilshisi.
Nıkolaı Sobolevskıı 13 jyldan beri Qaraǵandy qalasynyń Qutqarý bólimshesinde bas qutqarýshy bolyp qyzmet etedi. Mamandyǵynyń qıyndyǵyna qaramastan, óz jumysyn jaqsy kóredi. Sonymen qatar, ol – súıikti jar, toǵyz balanyń ákesi.
Kóp balaly Nıkolaı men Tatıana Sobolevskııdiń isin erlikke balaýǵa bolady. Nıkolaıdyń áıeli Tatıana balalar úıinde tárbıeshi. Olar búginge deıin alty balany asyrap alǵan. Oǵan qosa, taǵy úsh týǵan balasy bar. Jetimderdi asyrap alý qyzy Nıneldiń ıdeıasy bolǵan. Bala kezinen anasynyń jumysyna baryp júrgen kishkentaı qyz, baýyrlarynyń bolǵanyn qalaıtynyn jetkizgen. Keıin Nıkolaı men Tatıana aqyldasyp, bireýi jetkiliksiz degen pikirge keledi. Osylaısha erli-zaıyptylar, Nıkolaıdyń áıeli jumys isteıtin balalar úıinen alty balany asyrap alady.
«Barlyq bala ata-ananyń meıirimin kórýi tıis», - degen otbasy ár balasynan nemere-shóbere súıýdi armandaıdy. Ózderiniń eki uly – Kırıll men Denıs bólek turady. Kishkentaılarynan taǵdyrdyń tálkegin kórgen Ksenııa, Nastıa, Karına, Alına, Marııa, Lýıza qazir áke men shesheniń meıirimine bólenip, baqytty ǵumyr keship jatyr. Dostyǵy myǵym, berekeli otbasynyń balalarynyń úlkeni – 24 jasta, kishisi – 10 jasta. Bul úıdegi ár balanyń taǵdyry san túrli. Alty balanyń árqaısysy túrli ulttan.
«Asyrap alǵan balalarymyzǵa deıin bizde jaǵdaıy tómen otbasynyń balasyn tárbıeleý tájirıbesi boldy. Biz Anara atty qyzǵa resmı túrde qamqorlyq jasamadyq. Tek balaǵa kóńil bólip, jaqsy kórdik. Anara bizdiń balalarmen qatar ósti. Jubaıym ekeýmiz qyzymyzdyń baqytty bolǵanyna qýanyshtymyz. Qazir ol 37 jasta, turmysta, 4 balanyń anasy», - dedi qutqarýshy Nıkolaı.
Degenmen, Sobolevskııler otbasy ártúrli jáne beıtanys balalardy tárbıeleý ońaı bolmaıtynyn bilgen. Tatıananyń aıtýynsha, barlyq qıyndyqtardy eńserýimiz Nıkolaıdyń qoldaýynyń arqasy deıdi.
«Biz eshqashan ákemizdiń biregeıligine kúmándanǵan emespiz. Ol bolmasa, men bir ózim sheshim qabyldaı alar ma edim? Joq. Barlyǵy onyń qoldaýymen! Qıyndyqtar men ýaıymdar ... olar kimde joq? Barlyq kóp balaly otbasylardaǵydaı. Búgingi tańda bizdiń qyzdarymyz keremet ana bolatynyna kúmánimiz joq jáne ata-analarynyń qatelikterin qaıtalamaıdy dep senimdi túrde aıta alamyz», - deıdi Tatıana.
Árbir qyz bala úshin áke – álemdegi eń jaqsy adam ekeni sózsiz. Nıkolaı Anatolevıch qıyn qyzmetine qaramastan árqashan otbasy úshin ýaqyt tabady. Qyzdarynyń aıtýynsha, ol jumysta qatal bolǵanymen úıde jumsaq, ári qamqor.
