Qaraǵandylyq kórshileriniń balalaryn qutqarý úshin 4 qabattan tastap jibergen
QARAǴANDY. QazAqparat - Órt kezinde kórshilerdiń beı-jaı qaramaýynyń arqasynda úsh bala aman qaldy, dep habarlaıdy «QazAqparat» HAA Qaraǵandy oblystyq TJD baspasóz qyzmetine silteme jasap.
2018 jyldyń 7 aqpanynda saǵat 13:57-de Qaraǵandydaǵy 12-shi shaǵynaýdanda ornalasqan bes qabatty turǵyn úıde órt shyqqany týraly habar túsken. Órt sóndirýshiler kelgen kezde 4-shi qabattaǵy 3 bólmeli páterdiń zaly men jatyn bólmesi janyp jatqan.
Kórshiler tútinniń ıisin sezip, órt sóndirýshilerge habarlasqan. Olar páterde balalardyń bolǵanyn bilip, ózdiginen áreket ete bastaıdy.
3-shi qabatta turatyn Tahır Zakızıanov dalaǵa kilem tósegen. Keıin óziniń balkony arqyly janyp jatqan páterdiń balkonyna shyǵyp, balalar jylap jatqan terezege jetedi. Qolyna 2016 jylǵy qyzdy alyp, ony áıeline bergen. Tahır 2011 jylǵy eki egiz uldy janyp jatqan páterden tereze arqyly shyǵarǵan, biraq jubaıy qoryqqandyqtan olardy ustap qala almaǵan. Sol kezde Tahır balalardy tóselgen kilemniń ústine tastaýǵa bel býǵan.
«Ózimniń ómirimdi emes, balalardy oıladym. Balalar qatty qorqyp, jylady. Olardy kezekpen tómenge tastadym», - deıdi Tahır.
Balalar zardap shekpegen, olar ystan ýlaný dıagnozymen aýrýhanaǵa jetkizildi, biraq dárigerlerdiń qaraýynan keıin úılerine qaıtaryldy.
Órt sóndirýshiler kireberistegi 15 turǵyndy evakýatsııalaǵan, sonyń ishinde eki bala bar. 20 sharshy metr aýmaqty sharpyǵan jalyn saǵat 14:48-de sóndirildi. Tilsiz jaýdy aýyzdyqtaýǵa 33 adam men 7 tehnıka jumyldyrylǵan.
Órttiń shyǵýyna balalardyń otpen oınaýy sebep bolǵan.
Qaraǵandy oblystyq TJ departamenti órt kezinde balalardy qutqarǵany úshin Tahır Zakızıanovty marapattaý týraly usynys joldamaqshy.
